365 dagar

Í dag er ár síðan ég flutti heim frá Kanada. Heilt ár. Mér finnst vera eitthvað svo stutt síðan, en samt finnst mér líka svo ótrúlega margt hafa gerst á þessu ári. Kannski þessvegna sem tíminn hefur verið svona fljótur að líða.

Þegar ég bjó úti sagði ég alltaf að ef ég flytti heim yrði örugglega erfiðast að venjast veðrinu og verðinu. Það var líka alveg rétt, ég er ekkert að fíla þetta skítaveður sem er búið að vera hérna undanfarnar vikur og finnst sumarið hafa verið ósköp stutt og ómerkilegt. Og það er víst óþarfi að fjölyrða hér um verðlagið... ekki víst að ég gæti stoppað ef ég hætti mér inn á þá braut. En auðvitað hafa báðir staðir sína kosti og galla á ólíkum sviðum. Það er margt sem maður saknar og oft vildi ég helst geta búið á báðum stöðum.

Þetta er nú samt búið að ganga ótrúlega vel miðað við allt og maður getur ekki kvartað. Stelpurnar búnar að standa sig eins og hetjur og hingað til hefur allt gengið upp varðandi vinnu, húsnæði o.þ.h. (7,9,13)

Maður veltir því óhjákvæmilega fyrir sér hvar maður verður staddur í lífinu eftir ár í viðbót. Ég vona allavega að árið framundan fari um mig heldur mýkri höndum en það síðasta. Alveg kominn tími til að geta farið að slaka aðeins á og njóta þess að vera til.

Jæja, þetta var nú bara svona smá alvarleiki í tilefni dagsins. Lofa að vera skemmtilegri næst!

Rúsína

Eftirfarandi samræður áttu sér stað á heimili mínu í gærmorgun:

Selma: "Erna, hentir þú rúsínunni minni?"
Erna: "Ég veit það ekki, hvernig leit hún út?"

Þetta er aðeins sýnishorn af þeim samskiptum sem eiga sér stað innan þessara veggja.

Er svo eitthvað skrýtið að maður sé eins og maður er!

!

Jæja, ég get ekki þagað lengur... ég er búin að fá nýja vinnu! Byrja 17. október hjá Össuri og felst starfið í því að setja saman eitthvað voða techno gervihné með tölvukubb (gervigreind) og segulmögnuðu glussakerfi (!), auk þess að gera við og yfirfara þessi sömu hné.

Þetta er lítil deild innan fyrirtækisins og þar vinna fyrir 6 karlmenn. Það verður líklega dálítið skrýtið eftir að hafa unnið á kvennavinnustöðum í mörg ár.

ZzzzzZzzzzZzzzz...

Í síðustu könnun spurði Forvitnispúkinn "Í hverju sefurðu venjulega?"

Niðurstöðurnar voru svona:

44% sofa í náttfötum
31% sofa nakin
13% sofa í nærbuxum eingöngu
6% sofa í nærfötum

og einn sefur í öllum fötunum.

Nú mega allir þeir sálfræðingar (eða áhugafólk um slíkt hið sama) tjá sig um hvað þetta segir um þá sem lesa þetta blogg!

He he

18. september

Fyrir nákvæmlega sex árum síðan var ég stödd á IWK barnaspítalanum í Halifax. Þangað hafði ég komið fyrr um nóttina eftir að vatnið fór, en síðan gerðist bara ósköp lítið. Ég var samt harðákveðin í því að láta ekki senda mig heim aftur, og flengdist upp og niður hæðir spítalans til að reyna að reka á eftir þrjóskupúkanum sem sat sem fastast í bumbunni.

Á endanum var ég sett af stað, rétt upp úr hádegi og þá hófst sko gamanið fyrir alvöru! Hefði ég vitað hvað beið mín þá hefði ég líklega bara látið svæfa mig sko... en ég þrjóskaðist við og fékk ekkert nema glaðloft til að kæta mig.

Í miðjum klíðum var svo bankað uppá og ég spurð hvort nokkrir læknanemar mættu vera viðstaddir. Jú, ég hélt það nú... svo þegar Júlía kom í heiminn tók á móti henni áhorfendaskari og klapplið!

Nú er þessi litli ormur orðin sex ára! Ótrúlegt alveg :)

Ég er'ann!

Ég hef verið klukkuð af henni Söndruðu og skulda víst fimm random staðhæfingar um sjálfa mig:

1. Ég nota skó nr. 39, á örugglega 20 pör... en finnst samt best að vera berfætt.

2. Uppáhalds rauðvínið mitt í heiminum heitir Lindemans Cawarra... mmmmmmm! -Veit samt ekki til þess að það fáist á íslandi.

3. Ég drekk tvo lítra af vatni á hverjum degi, en drekk aldrei vatn með mat.

4. Fyrstu skíðin mín voru fullorðinsskíði sem pabbi sagaði aftanaf. Þau voru úr tré og með leðurbindingum og pabbi nuddaði kertavaxi undir þau til að þau rynnu betur! Fyrstu skautarnir mínir voru líka með tvöföldum járnum.

5. Mig dreymir um að eignast Dodge Durango... en ég myndi aldrei tíma að kaupa bensín á hann.

Ég ætla að klukka Rósu, Ásdísi, Gurrý, Jóhönnu og Kollý. Þið eruð'ann!

Moðða fogga

Fékk bréf frá Lögregluskólanum í dag, svohljóðandi:

"Blablabla, blablabla, blablablabla, allar einkunnir, utan sundeinkunarinnar, eru mjög góðar... blablabla, hvetjum þig til að sækja aftur um að ári".

Að ári. Maður fær einn séns og þarf svo að bíða í ÁR.

Bjóst svosem alveg við þessu, en ég er samt ÓGIZZLEGA svekkt.

ÓGGIZZLEGA!

BLEH!

Brandari

Í Þykkvabænum
Gamall maður bjó einn í Þykkvabænum. Hann langaði til þess
að stinga upp kartöflugarðinn en það var of mikil
erfiðisvinna fyrir hann. Sonur hans, Bubbi, var sá sem
hjálpaði honum venjulega en Bubbi sat á Hrauninu. Gamli
skrifaði honum bréf og sagði honum frá vandræðum sínum:

"Elsku Bubbi minn. Mér líður hálf-illa því það lítur út
fyrir að ég geti ekki sett neinar kartöflur niður í garðinn
þetta árið. Ég er að verða of gamall til þess að stinga upp
beðin. Ef þú værir hérna ætti ég ekki í neinum vandræðum
því ég veit að þú mundir stinga upp beðin fyrir mig. Áttu
von á helgarleyfi bráðlega?
Kær kveðja elsku sonur, pabbi."

Eftir örfáa daga, fékk hann bréf frá syni sínum:
"Elsku Pabbi Í GUÐANNA BÆNUM EKKI STINGA UPP GARÐINN!
Ég gróf dópið og byssurnar þar!
Þinn Bubbi. "

Í birtingu morguninn eftir komu hópar lögregluþjóna frá
embætti Ríkislögreglustjóra og Selfosslögreglunni og
umbyltu öllum beðunum, en fundu hvorki dóp né byssur. Þeir
báðu gamla manninn afsökunar og hurfu á braut.

Sama daginn fékk hann annað bréf frá syninum:
Elsku pabbi. Við núverandi aðstæður gat ég ekki gert betur.

Þinn elskandi sonur Bubbi.

Sjálfsþurftarbúskapur

Fór í sveitina með stelpurnar um helgina. Fengum yndislegt veður og fórum út á vatn að veiða. Fékk fallegan sjóbirting, fór með hann heim og borðaði hráan á hrísgrjónum með engifer og soja.

Svona á að gera þetta!

(p.s. veit einhver hvar maður fær wasabi og sjávarþang?)

Það er þetta með perurnar

Samkvæmt síðustu könnun forvitnispúkans borðar aðeins helmingur bla-lesara hýðið af peruávöxtum. Það þýðir (samkvæmt mínum stærðfræðiútreikningum, sem eiga það þó oftar en ekki til að vera rangir) að helmingurinn borðar ekki peruhýði.

Nú hlýt ég að spyrja (og pardon my french); "What's up with that??" Hvað er það við peruhýði sem er svona óaðlaðandi? Ég meina... ég skil vel fólk sem borðar ekki hýðið af kíwí, enda geri ég það ekki sjálf. En ég þekki samt fólk sem borðar hýðið af kíwí, eins loðið og það nú er.

En perur??

Frétt vikunnar

Tóti Trúður hefur tilkynnt að hann hafi hug á að gerast borgarstjóri í henni Reykjavík. Ku hann hafa fengið 47% fylgi í skoðanakönnun, sem verður nú bara að teljast nokkuð gott!

Aðaláherslur Tóta í borgarmálum munu meðal annarra verða þær að allir skulu á laugardögum skarta rauðu nefi og enginn megi nota skó undir stærð 46.

Blaðrarinn óskar Tóta hérmeð velfarnaðar í starfi, enda efast ég ekki um að hann nái stólnum. Það væri svo innilega í stíl við annað í þessu blessaða stjórnkerfi okkar.

:)

Til hamingju, Bobby og Jóhanna með litluna ykkar! Krílið fæddist í gær, eftir ansi langa bið og mikið púl. Myndarstelpa, 15 og hálf mörk og 53cm.

...

When you try your best but you don't succeed
When you get what you want but not what you need
When you feel so tired but you can't sleep
Stuck in reverse

And the tears come streaming down your face
When you lose something you can't replace
When you love someone but it goes to waste
Could it be worse?

Lights will guide you home
And ignite your bones
And I will try to fix you

And high up above or down below
When you're too in love to let it go
But if you never try you'll never know
Just what you're worth

Verðlaunin ekki af verri endanum!

Af visir.is:

"Björn bestur í hrútaþukli"

"Eftir harða keppni hrósaði Björn Þormóður Björnsson, bóndi og kjötmatsmaður á Ytra-Hóli í Vindhælishreppi, sigri á Meistaramótinu í hrútadómum í Sævangi á Ströndum á sunnudag. Hann hlaut meðal annars 15 skammta af hrútasæði í verðlaun."

"Björn heldur nokkrar kindur en vill ekki láta uppi um fjölda þeirra. "Þetta er innan skynsemismarka," segir hann og viðurkennir um leið að aðalverðlaunin, 15 skammtar af hrútasæði frá Sauðfjársæðingastöð Vesturlands, komi að góðum notum."

I need a hug...

Var að klára prófið. Gekk vel í bóklega fyrir hádegi (íslenska, enska, danska og almennar þekkingaspurningar) og eins framanaf í púlinu eftir hádegi (meira að segja þó þeir þyngdu bekkpressuna!). Endaði svo á því að falla á sundprófinu, fór 17 sek. yfir tímann.

Ætla samt ekki að leggjast í þunglyndi strax, á von á bréfi með niðurstöðunum á næstu dögum og fæ þá að vita meira um framhaldið ef eitthvað verður.

Adios.

Time for the rest of the world to know...

Jæja, þá er fjögurra mánaða bið á enda... á morgun mun ég þreyta þetta próf.

Nú eiga allir að krossleggja fingurna fyrir mig og senda mér fullt af góðum 'vibes'. (Gáfustrauma fyrir hádegi og kraftastrauma eftir hádegi, takk!)

Ekki veitir af, því af 115 umsækjendum stendur til að taka inn 32! -Þá kemur í ljós hvort allt spriklið í ræktinni hefur skilað sér.

Læt ykkur vita hvernig gengur :)

(Ég vona samt að það verði ekki prófað í kleinuhringjaáti, er ekkert sérstaklega hrifin að þessháttar fóðri)

Viljiði ekki höggva af mér handlegginn líka?

Hvernig má það vera að í landi þar sem er almenn skólaskylda, sé ekkert þak á álangningu á skólavörur? Ritfangaverslanir og aðrar búðir sem selja skóladót, okra á því eins mikið og þeim þóknast og mokgræða fyrir vikið. Ég man að í fyrra eyddi ég 15000 kalli í ritföng fyrir Ernu og Selmu, og það voru bara blöð, stílabækur og skriffæri sem þær vantaði uppá, af því þær voru að koma inn í skólann á miðjum vetri. Ég meina kommon, hvað haldið þið að blýantur kosti í framleiðslu? Eða nokkur lausblöð eða plastmappa? Skít og kanil, that's how much!

Nú er Júlía að byrja í skólanum og þurfti auðvitað að fá sína skólatösku og tilheyrandi. Bara taskan kostaði yfir 8000. Af því að ég vildi almennilega tösku með góðu baki og axlarólum, en allt undir þessu verði voru bara einhverjar pokatuðrur. Bara pennaveskið (sem reyndar innihélt liti, blýanta o.s.frv.) kostaði 2000 kall! Og það var sko ekki það dýrasta. Svo er blaða- og stílabókadótið eftir.

Þetta stefnir þessvegna hátt í 20. þúsundið fyrir eina sex ára skottu sem er að byrja í skóla. Og þá er ekki talin ný úlpa, skór, húfur, vettlingar o.s.frv. (Eins gott að fara að taka fram prjónana)

Mér finnst þetta algjörlega út í hött (voruð þið kannski búin að fatta það). Mér finnst að það eigi klárlega að setja þak á álagningu á þessar vörur sem við komumst ekki hjá að kaupa á hverjum vetri. Og hananú!

Huh?

Í útvarpinu hljómar þessa dagana auglýsing, einhvern vegin svona:

"Vissir þú að lambalærissneiðarnar frá okkur eru eingöngu úr miðlærinu?"

Nú lýg ég engu þegar ég segi að ég fylgdist mjög vel með í náttúrufræðitímum á sínum tíma, enda flestar greinar hennar í uppáhaldi. Ég get samt svarið að aldrei hef ég heyrt um lömb með þrjú læri.

Þarf að skoða þetta eitthvað betur við tækifæri.

Smælað framaní heiminn

Hvað er með þetta kolbrjálaða veður?! Arfavitlaust rok og rigning búið að skekja allt hérna síðan í gærkvöldi. Rimlagardínan í svefnherberginu hjá mér stóð lárétt út í loftið og ég beið eftir að fá húsgögnin af svölunum í gegnum gluggann. Ég var reyndar voða fegin að þurfa ekki að mæta í vinnuna í morgun, fátt eins gott og að kúra undir sæng og hlusta á lætin úti.

Maður fer víst ekki í berjamó í dag... en þau verða þá bara orðin stærri og feitari um næstu helgi.

Varúð! Ljótt!

Hössi bróðir var að verða 'afi'!! :D

Kúlasti markvörðurinn!!

Here fishy, fishy...

Komin heim, dauðþreytt og veðurbarin. Búin að skola sandinn úr eyrunum og skafa hreystrið undan nöglunum. 5 urriðar og 1 bleikja í valnum. Einn slapp, svona til að hafa þetta aðeins sanngjarnara (fór reyndar með öngulinn með sér, svo greyið á víst ekki miklar lífslíkur).

E-mobile stóð sig ótrúlega vel á hálendinu. Hver sagði svo að maður þyrfti að eiga jeppa? -Og eyddi ekki nema 30 l í öllum túrnum :)

Þurfti að stinga hina af til að ná í stelpurnar á flugvöllinn í fyrramálið. Svo verður grillveisla þegar restin af liðinu kemur heim með aflann!

Ég þurfti reyndar að sitja á mér með að bíta í spriklandi silunginn. Það voru meira að segja til bæði hrísgrjón og soja, en ekkert þang... bara ferskvatnsslý! (bleeeh) Kannski maður taki þang með næst og smá wasabi. Svo má nota njóla fyrir prjóna ;)

Kusuluk

Ég verð víst að éta þetta ofaní mig með heppnina. Heimferðin gekk ekki síður vel en ferðin út. Málmleitarhliðin steinþögðu og enginn virtist hafa neinn áhuga á innihaldinu í töskunum mínum. Fór meira að segja með tjald í gegn án athugasemda, en það er auðvitað bannað að koma með notuð tjöld til landsins. Flaug aftur með nýju breiðþotunni, þvílíkt skrímsli sem hún er. Fylgdist með á tölvuskjá þar sem vélin sneiddi framhjá suðurodda Grænlands og Kulusuk hét Kusuluk og svo suðurmeð Faxaflói Bay!

Á móti mér tók bíllinn nýsmurður, upphækkaður og búinn að fara í alsherjar læknisskoðun. Heima beið svo blokkin nýmáluð og fín. Maður verður greinilega að fara oftar í frí.

Framundan, Veiðivötn með tilheyrandi rigningarspá. Vonandi að nýja tjaldið standist íslenska veðráttu. Aflatölur birtar seinna... eða ekki.

Önnur smá melding

Steikingin heldur áfram. Komst að því að þegar maður eyðir þremur klukkutímum á ströndinni (og þar af einum í sjónum) þá gerir sólarvörn lítið gagn. Júlía brann sem betur fer lítið en lítur núna út eins og svertingi í hvítum sundfötum.

Hitinn fór upp í 32 gráður í gær, en var þolanlegur því rakinn var ekki svo mikill. Búin að ná mér í nokkur moskítóbit líka, svona til upprifjunar.

Fór og hitti Concepts stelpurnar (hárgreiðsluskólinn) á pöbb í gærkvöldi sem var mjög gaman. Allar orðnar harðtrúlofaðar og tvær á leiðinni upp að altarinu.

Afrekaði að fljúga á hausinn á hlaupabrettinu í ræktinni í fyrradag. Alveg ótrúlega flott og lá við að það væri klappað fyrir mér.

Búin að flýta heimförinni og kem á miðvikudag, en stelpurnar verða áfram til mánaðamóta. Ætla að reyna að finna mér tjald hérna svo maður geti kannski farið í útilegu.

Adios elskurnar, hlakka til að sjá ykkur.

Smá melding

Komumst hingað heilu og höldnu á þriðjudagskvöld. Vorum klukkutíma styttra í loftinu en áætlað var. Sluppum alveg við að strippa fyrir eftirlitsmenn þetta skiptið og tollararnir rótuðu bara ekkert í töskunum okkar, ótrúlegt en satt. Brjóstahaldarinn minn pípti ekki einu sinni í málmleitarhliðinu. Ætli við fáum þetta svo ekki allt saman tvöfalt í hausinn á heimleiðinni, maður er bara svona heppinn einu sinni held ég.

Vaknaði með andfælum klukkan sex á miðvikudagsmorgun við rosa sprengingu og blossa sem lýsti upp allt herbergið. Fyrir utan er rafmagnsstaur með tilheyrandi köplum sem liggja þvers og kruss um bæinn. Þar hópast saman krákur eldsnemma á morgnana og keppast við að garga hver í kapp við aðra. Ein þeirra hafði semsagt þennan morgun gerst heldur nærgöngul við einn rafmagnskapalinn, með tilheyrandi skammhlaupi... og steiktri kráku.

Veðrið er búið að vera svona 25+, léttskýjað og smá gjóla. Fór á ströndina í morgun og svo út að hlaupa og lít núna út eins og crossbreed af karfa og humri... kannski heldur rauðari.

Líka búin að sjoppa smá. Það er yndislegt (og stórhættulegt) að versla föt og þurfa ekki að láta veðsetja eigin sál fyrir upphæðinni.

Vonandi eruð þið öll stillt og góð þó ég hafi brugðið mér aðeins í burtu.

Pikka meira fljótlega.

Síðustu dagar...

Óþolið: Bush (já, ég kenni honum um þetta allt)
Ljóskan: Gamli maðurinn á Sirkus sem hjálpaði þeim blinda að finna bílinn sinn
Gubbið: Innreið slúðurblaða (og fólkið sem les þau)
Vitleysan: Að Hlölli veiddi 50 fiska í gær (Þeir voru bæði litlir og ljótir!)
Vonbrigðin: Dýragarðurinn í Slakka
Böggið: Að keyra á fugl :(
Lærdómurinn: Fuglar eru vitlausir
Uppgötvunin: Átti að smyrja bílinn fyrir 6000km
Kúlið: Einn dagur í sumarfrí
And-til-hlakkið: Logan Airport
Til-hlakkið: 25+ celsius



It's all your fault!

Sjálfboðaliði óskast...

til að vökva fiskana og fóðra blómin, ca. þriðja hvern dag á tímabilinu 15. júlí til mánaðamóta. Og kannski tæma póstkassann í leiðinni... ég skal kaupa eitthvað krúttlegt í útlandinu handa viðkomandi í staðinn :)

Anyone?



Hver vill passa okkur? 

Scumbag

Ég afrekaði að stífla eldhúsvaskinn í gær. Förum ekkert nánar út í hvernig ég fór að því nema hvað grjónagrautur spilaði þar eitt af aðalhlutverkunum (með rúsínum). Það er svona að vera vanur að búa í útlöndum og vera með ruslakvörn (ég ætla allavega að nota það sem afsökun, frekar en eigin dómgreindarleysi). En... þar sem ég er útskrifuð með meirapróf á drullusokk (líka eftir að hafa búið í útlöndum, þar sem allar pípur, klósett og niðurföll virðast vera þrengri og þar af leiðandi stíflugjarnari en við eigum að venjast) þá dreif ég mig í dag eftir vinnu og fjárfesti í einum slíkum.

Drullusokkur er eitt af mínum uppáhalds verkfærum. Svona einfaldur og náttúruvænn en svínvirkar, og heitir svo svona skemmtilegu nafni. Allavega... ég kem heim með gripinn, bretti upp ermarnar (var reyndar í stuttermabol en hitt hljómar betur) og byrja að hamast á vaskinum með tilheyrandi sulli, soghljóðum og góðri lykt. Og eftir langa og stranga viðureign með sokkinn að vopni tókst mér loksins að losa stífluna (ég held mig muni ekki langa í grjónagraut á næstunni).

Jæja, í sigurvímunni ákvað ég að láta ekki staðar numið þar heldur athuga hvort mér tækist ekki að fá betra rennsli niður úr baðherbergis vaskinum líka, sem hefur verið eitthvað tregur alveg síðan við fluttum inn. Ég storma inn á bað með drullusokkinn á lofti, nú skyldi aldeilis tekið til hendinni. Eftir mikið og kröftugt hjakk, sull og svínarí var þó enginn munur á niðurrennslinu.

Og núna þegar ég skrúfa frá vaskinum, kemur vatnið beint upp um niðurfallið á gólfinu.

Letihelgi dauðans

Sváfum allar út bæði í gær og í morgun. Ég var reyndar búin að gefa sjálfri mér leyfi fyrirfram að vera löt þessa helgi, en það hefur nú samt ekki tekist alveg án samviskubits.

Skrapp í gær á Rauðalækinn að klippa litla frænda, sem er að fara á Hróarskeldu í dag. Tveir af vinunum ætluðu að raka sig sköllótta með því skilyrði að frændi fengi sér hanakamb (mohawk). Ég fékk sumsé þann heiður að fá að klippa kambinn og skemmti mér konunglega. Systa var sem betur fer ekki heima, enda líklega betra fyrir mig að vera fjarri góðu gamni þegar hún sér soninn svona útleikinn.

Hann er núna í stíl við persalæðuna á heimilinu sem einnig var nýklippt. Alla jafna er hún ekkert nema hárið. Nú var búið að raka allan líkamann og lappirnar, fyrir utan loppurnar, hausinn og skottið! Ég held ég verði að reyna að ná í mynd af henni til að setja hingað inn (Sandra?).

Tvær vikur í Kanödu. Það verður skrýtið að koma heim eftir níu mánaða fjarveru. Mjög skrýtið.

Jæja. Nú er það Bónus. Ræktin. Júlla í afmæli. No more lazybum-ing.



...

Hlaupi-hlaup

Tók í fyrsta skipti í gær þátt í hlaupi. Hef reyndar farið í svona 'skemmtiskokk' áður með skjólstæðinga af Kópavogshæli, en þetta var svona alvöru. Þetta var semsagt Miðnætur-Jónsmessuhlaup sem ég frétti af í gær og eins og flestar mínar ákvarðanir, varð þessi til í skyndi (á um það bil .4 sekúntum)... og ég skráði mig í 10km hlaup. Eftir skráninguna byrjaði nagið; hvað er ég nú búin að koma mér í? Hef ekki hlaupið þessa vegalengd í næstum því ár, þó ég hafi auðvitað verið að hlaupa styttri vegalengdir síðan. En þetta gekk bara vel og markinu var náð á 53 mínútum.

Powerade var styrktaraðili hlaupsins og voru drykkjarstöðvar í hringnum þar sem fólk útdeildi glösum til hlauparanna. Þá greip maður glasið á hlaupunum, sötraði innihaldið í sig án þess að stoppa og hélt svo áfram. Nema hvað. Ég var auðvitað í mínum hvíta galla í hlaupinu. Powerade drykkurinn var himinblár. Hafið þið einhvern tímann reynt að drekka úr fullu pappaglasi á hlaupum? Need I say more?

Nú á ég medalíu og bládoppóttan hlaupagalla.

Whip cashbook?

Þegar maður hefur akkúrat ekkert að gera getur verið gaman að leika sér í svona translation vélum á netinu. Það er samt gott að sú sem ég fann í dag er ókeypis. Ég prófaði að slá inn þetta:

Gamli Nói, gamli Nói
keyrir kassabíl
hann kann ekki að stýra
brýtur alla gíra
Gamli Nói, gamli Nói
keyrir kassabíl

...og svona snaraði vélin þessu yfir á ensku:

Gamli Nói gamli Nói
whip cashbook
he jug not snuggle up to steer
brýtur allir giraffe
Gamli Nói gamli Nói
whip cashbook

Athyglisvert.

Jæja...

Af beygla.is:

"Fatahönnuðir í Japan og Austurríki vinna nú saman að því að gera fatalínu fyrir hænur.

Austurríkismaðurinn Edgar Honetschlaeger sagði að hann hefði ákveðið að fara í samstarf með Japönunum til þess að gera fötin glæsilegri.

Núna er hænu-tískusýningar um allan heim þar sem Edgar og félagar kynna nýja klæðnaðinn.

Nú þegar hefur þónokkur fjöldi keypt föt fyrir hænurnar sínar."



Fashion Chick!

Til hamingju

Sögulegur viðburður átti sér stað nú í morgun þegar dýr af annari tegund en Homo Sapiens var ráðið til starfa bæjarstjóra í bæjarfélagi hér á landi. Um er að ræða stóran og stæðilegan blöðrusel; Cystophora cristata, og er dýrið karlkyns.

Reyndar hafa áður verið ráðin til ýmissa embættisstarfa aðrar tegundir en Homo Sapiens. Má þar helst nefna apa ýmiskonar, t.d. simpansa; Pan Troglodytes. Einnig gegna allmargir asnar; Equus asinus, ábyrgðarstöðum víða um land.

En ég óska hérmeð blöðruselnum velfarnaðar í starfi. Ekki veitir af fjölbreytninni í fánu landsins.



Cystophora Cristata

Íslendingar eru klikk

Víða hefur maður nú orðið var við þessa celeb dýrkun (fræga fólks dýrkun) en hvergi eins og hér. Sem er út af fyrir sig fyndið því ekki þarf fólk nú að vinna sér mikið til frægðar til að vera orðið celeb á Íslandi. Nema hvað...

Nú er sumsé að byrja í útvarpinu þáttur með útvarpskonu sem er að byrja aftur eftir langt hlé (og ég sem var svo fegin þegar hún hætti). Þátturinn er sendur út einu sinni í viku og ef ég er ekki að misskilja eitthvað mun þessi kona velja eitt íslenskt celeb í hverjum þætti. Þetta sama celeb á svo að búa til lista yfir þá tíu Íslendinga sem honum/henni þykja merkilegastir.

Jæja. Þegar öll celebin hafa valið sinn lista, fær sauðsvartur almúginn allrar náðarsamlegast að velja hvert þessara celeba fær að bjóða öllum tíu manneskjunum á sínum lista... í matarboð.

Og það er allt og sumt.

Jæja, eruð þið ekki orðin spennt yfir að fá að taka þátt í valinu? Allir að pissa í sig bara, erþakki?

Það sorglegasta við þetta er að það er fullt af fólki sem fylgist spennt með og tekur þátt.

Greyin.

Forvitnispúkinn

Sumarfrí?

Ja hérna

Nú er ég hissa. Ég sem var svo viss um að Selma kæmist áfram. Já, og eiginlega bara viss um að hún myndi vinna... eða allavega svona næstumþví. Ég er samt eiginlega ekkert svekkt, bara hissa.

Mér fannst voðalega fá lög þarna sem varið var í. Eiginlega einkenndist keppnin af ljóskum sem voru að týna brjóstunum á sér og George Michael wanna-be-but-sure-as-hell-isn't-um. Og hvað var þetta með þessa frá Hvíta Rússlandi sem söng eins og cross breed af Stevie Nicks og kindinni Dolly? Ég hélt hún myndi enda þarna alls nakin blessunin, á gærunni einni saman.

En nú vita auðvitað allir hvað á að gera erþakki? Nú er það bara ÁFRAM NOREGUR! Mikið hrikalega voru þeir ógisslega frábærir. Söngvarinn meira að segja með svartan varalit og allt, spandex og lögguhattar; hrein snilld!

Svo þið sem ætluðuð að hætta við partýið á laugardaginn og leggjast í þunglyndi... nú breytið þið bara planinu og skiptið út íslensku fánunum á ostabakkanum fyrir norska. Ekki málið!



Lifi Rokkið! =D

Uppstillingadagur

Í boði þessa sannkristna samfélags sem ég bý í, var frí í vinnunni hjá mér í dag, sem og hjá flestum öðrum. Ég þakka bara fyrir mig og vona að enginn lái mér að notfæra mér þennan frídag þó ég geri það á annara forsendum. Finnst dálítið merkilegt þegar ég spái í það, að dagar sem tengjast trúnni skuli vera svo algengir og sjálfsagðir sem almennir frídagar. Mér finndist allavega skrýtið ef allt í einu fengju allir frí daginn sem Muhammed fór ti Mekka eða eitthvað álíka. Þó vita allir að hér býr fullt af fólki sem trúir á eitthvað annað en Jesú Krist og co. En ég ætla nú samt ekkert að vera að kvarta yfir því að fá frí sko.

Planið: Vinna á morgun og svo bara helgi. Ekkert sérstakt planað fyrir hana... any suggestions?

Hélstu að atti-katti-nóa væri rugl?

Var að keyra heim úr Bónus með Júlíu í bílnum og útvarpið stillt á Útvarp Latabæ. Mjög fyndin útvarpsstöð með mjög góða stefnu, en tónlistin sem er spiluð er allt frá þessum klassísku barnalögum upp í hálf klúra útilegusöngva, sem maður hefur aldrei sungið nema undir áhrifum.

Nema hvað, við erum semsé að keyra þegar upphafstónar þessa lags byrja að óma. Og einhverra hluta vegna fór ég að hlusta á textann: (ég birti þetta með fyrirvara um villur, enda lærði ég aldrei þessa vísu)

Ég á litla mús, hún heitir Heiða
ég var að greiða henn'í dag, herra Jón.
Hún er voða sæt, hún kann að dansa
og hún dansar svo vel, herra Jón.

Þó að hún sé feit, þá er hún ofsa mikið krútt
með rauða slaufu í skottinu.
Ég mun alltaf hafa hana hjá mér
ég ætla'ð gefa henni ost, herra Jón.

Hún mun aldrei fá að sleppa frá mér,
ég ætla'ð gæta hennar vel, herra Jón.

Mig langar að vita á hverju höfundurinn var þegar hann samdi þetta. Og hver er þessi 'herra Jón'?! Svo er fólk hissa á því að æska vor sé á hraðri leið til glötunar. Ég er ekki frá því að ég sjálf þurfi eins og einn-tvo tíma í þerapíu eftir þessa lífsreynslu.



Heiða?

Það er hvort eð er ekkert gaman að vera venjulegur...

Enn ein hávísindaleg könnunin hér á Bla-inu hefur nú leitt af sér athyglisverðar niðurstöður, sem segja um leið ýmislegt um þá sem hingað rata inn.

Spurningunni; hvernig lestu dagblaðið? var svarað eftirfarandi:

11% byrja fremst
56% lesa blaðið afturábak
11% lesa teiknimyndasögurnar fyrst

og 22% lesa blaðið á hvolfi!

Þarf nokkuð frekari vitnanna við? En við erum samt öll ágæt á okkar sérstaka hátt erþakki ;)

Ofsakátur Jónsson

Af visir.is:

Má heita Hilaríus

"Það má heita Hilaríus samkvæmt ákvörðun mannanafnanefndar. Nefndin tók beiðni um eiginnafnið Hilaríus til greina nýverið og hefur fært það á mannanafnaskrá. Nafnið tekur eignarfallsendingu, eða til Hilaríusar, og telst uppfylla ákvæði laga um mannanöfn.

Samkvæmt ensk-íslenskri orðabók þýðir „hilarius“ að einhver sé ofsakátur eða eitthvað sé stórskemmtilegt."

Ja, hérna. Ekki er öll vitleysan eins...

Þvílík snilld!

"Þessi vélknúna vekjaraklukka á hjólum hringir og skýst síðan í felur þannig að eigandinn verður að fara á fætur og finna hana til að slökkva á henni. Gripurinn er uppfinning Gauris Nandas, framhaldsnemanda við Tækniháskólann í Massachusetts (MIT) í Bandaríkjunum. Hann kallar tækið 'Clocky'." (af mbl.is)

Ég get ímyndað mér að þessi klukka verði hötuð af mörgum morgunsvæfum eigandanum. Ég held ég myndi allavega ekki storka mínu eigin morgungeði með svona grip :)



Clocky! 

"Here fishy, fishy..."

Langþráður draumur rættist um daginn þegar mér áskotnaðist fiskabúr. Nú eigum við mæðgur sinn fiskinn hver (góð byrjun allavega :)

Júlíu fiskur er gulur og heitir Nemo (lesist 'Nímó' með kanadískum hreim). Eitthvað segir mér að hann sé ekki eini skrautfiskurinn með þessu nafni, sbr. alla kettina sem heita Simbi, Nala o.s.frv.

Selmu fiskur er röndóttur og heitir Pig. Selma elskar svín og langar í eitt slíkt sem gæludýr, svo þetta er svona smá friðþæging :)

Ernu fiskur heitir Fluffy, enda rosalega loðinn og krúttlegur... eh... já, einmitt.

Minn heitir svo auðvitað Bobby, eftir Fishernum fræga... enda ljótastur af þeim öllum.


Nemo, Bobby, Pig og Fluffy. 

Getiði hvað...
(skrolla niður)
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.

DÓTIÐ OKKAR ER KOMIIIIIIIIIIIIIIIIIIIIÐ! =oD 

Gleðilega Páska!

Málshættirnir:

Ég: "Sá er vinur sem í raun reynist"

Erna fékk tvo: "Það gleymist seint sem aldrei hefur lærst" og "Það sem ekki er vert að sé lesið nema einu sinni, er ekki vert að það sé lesið". Ótrúlegt prump þetta.

Selma: "Það er ekkert varið í nema fyrsta kossinn og hinn síðasta, hinir eru ekkert annað en hortittir". Bleeeeeeh...

Júlía: "Von og trú eru þjónar árangursríkra manna"

Voðalega þynnkulegir eitthvað þetta árið, nema kannski minn. Eins og einhver hafi setið og rembst við að búa til eitthvað gáfulegt og endað með eitthvað blaður. Ég kannast allavega ekki við að hafa heyrt þá áður.

Eggjunum voru allavega gerð góð skil og engin vonbrigði þar. Og nú bíðum við bara eftir gámnum með dótinu okkar sem inniheldur m.a. gönguskíðavélina =)



Gleðilega Páskegga! 

Jei!

Næstfrægasti Íslendingur í heimi (samkvæmt fjölmiðlum) er lentur í beinni útsendingu. Á móti honum tók hópur fólks, sem í geðshræringu sinni hoppaði, dansaði og kallaði 'Bobby! *klappklappklapp* Bobby! *klappklappklapp', eftir að hafa staðið í nokkra klukkutíma úti á flugvelli í rigningunni og beðið eftir þotu hans. Hann gaf sér þó ekki tíma til að knúsa þessa vini sína, heldur hoppaði upp í bifreið sem beið hans og brunaði burt, enda karlanginn auðvitað þreyttur eftir ferðalagið.

Þetta er nú ekki lítil skrautfjöður í hatt okkar Íslendinga, að geta státað af yfirlýstum gyðingahatara og skaphundi með meiru, og gerir flóru okkar enn skrautlegri, þó auðvitað höfum við verið æðislegir fyrir. Og auðvitað fer hann beint á launaskrá hjá ríkinu eins og aðrir stórmeistarar í skák, skítt með það þó hann hafi lýst því yfir að 'skákin sé steindauð' og hann ætli sér ekki að setjast aftur að tafli.

Ég segi bara eins og greinarhöfundur í Rocky Mountain News: "...verði ykkur hann að góðu!"



Velkominn heim...! 

Hvað ætlar þú að gera um páskana?

Það lítur út fyrir að þeir sem hingað koma séu letihaugar upp til hópa. Þar með talin ég :)


Niðurstöður vísindarannsóknar. 

This better be the last of it

Hvaða ógeðs skítaveður er þetta? Ég ætla að ganga út frá því sem vísu að hér sé páskahretið á ferð, fullsnemma og þessvegna eins gott að veðurguðinn hagi sér skikkanlega þegar það er gengið yfir.

Búin að kaupa páskaegg (eiginlega fyrir löngu). Þau bíða hér í kassa uppi í skáp og hía á okkur í hvert sinn sem við nálgumst. En við látum sko ekki bugast því við erum sterkar! Rosalega sterkar! (garg... 10 dagar í viðbót)

Ég veit allavega að ég ætla EKKI að fá mér svona:


Páskaegg með Jesú?

Bara verð að sýna ykkur þessa :)

Þessi ótrúlega myndarlega litla frænka var skírð í gær. Hún heitir því fallega nafni Elísabet Ósk rúsínurass!


Elísabet Ósk

Læknur og hjúkrunarkarlar

Ég er mikil jafnréttismanneskja en mun þó seint láta hengja nafn mitt við kvennréttindabaráttu. Ástæðan? Skoðun margra er sú að þetta tvennt sé ekki hægt að aðskilja, en ég vil meina að þarna sé munur á.

Mér finnst alveg ótrúlegt að á Íslandi séu lög þess efnis að ef tveir jafnhæfir einstaklingar af gagnstæðu kyni sækja um sama starfið, skuli veita konunni það. Myndi ég kæra mig um að fá vinnu á þessum forsendum? Í nafni jafnréttis? Nei, ég held ég myndi eftirláta karlinum stöðuna og leita eitthvert annað eftir vinnu. Ég trúi því að engir tveir einstaklingar geti verið nákvæmlega jafn hæfir til eins eða neins. Það hlýtur alltaf að vera hægt að finna eitthvað öðrum til framdráttar, nú eða foráttu. Það eru akkúrat svona mál sem veikja jafnréttisbaráttuna og gefa konum rauðsokkustimpla (í neikvæðri merkingu).

Því miður verð ég oft vitni að því hvað konur eru meðvirkar í kynjamismununinni. Þannig var það þegar Júlía byrjaði á leikskólanum og einn leikskólakennarinn (kona) var að sýna mér deildina. Þegar kom að dúkkukróknum sagði hún eitthvað sem svo: "...hérna leika stelpurnar sér í dúkkó, og svo leika strákarnir sér inni í herberginu þarna með bílana". Var mér að misheyrast? Á menntastofnun á Íslandi (sem ég hélt að stæði nú frekar framarlega í þessum málum) á tuttugustu og fyrstu öld! En vitið þið hvað? Ég er viss um að þessi kona myndi aldrei skrifa upp á það að strákar mættu ekki leika sér að dúkkum eða stelpur að bílum. Þetta var örugglega alveg ómeðvitað.

Í útvarpinu um daginn heyrði ég svo umræður um það hvort koma ætti á leikskólaskyldu á Íslandi. Kona sem þar lét í sér heyra sagði m.a. að ríkið ætti að greiða konum fyrir að vera heima með börnum sínum. Af hverju konum? Til þess að stuðla frekar að því að konurnar séu heima með börnin á meðan karlarnir vinna úti? En er það ekki einmitt það sem við höfum verið að reyna að breyta síðustu árin? Ég er líka alveg viss um að þessi kona var ekki meðvituð um það sem hún var að segja. Hún væri örugglega ekki síður sátt við að karlar fengju borgað fyrir að vera heima með börnum sínum. En það er einmitt þetta "meðvitundarleysi" sem er svo erfitt að eiga við.

Að lokum langar mig að minnast aðeins á blessuð stöðuheitin sem alltaf eru að þvælast fyrir okkur. Þar finnst mér reyndar oft vera óþarflega mikil smámunasemi í gangi. Af hverju má t.d. karlmaður ekki bara vera fóstra? Allar fóstrur voru fóstrur þangað til karlar tóku að leita í störfin. Þá var þeim breytt í leikskólakennara. Ég meina, konur mega vera læknar án þess að nokkur kippi sér upp við það. Ekki er til neitt sem heitir lækna eða lækniskona. Konur geta líka verið þingmenn, enda eru jú konur líka menn. Mín vegna mega karlar alveg vera fóstrur eða hjúkkur, það truflar mig ekki neitt. En það er einmitt þessi endalausa niðurhólfun sem lætur jafnréttismál oft snúast upp í andhverfu sína.

Svo hvernig væri nú að slaka aðeins á í baráttunni og einbeita sér frekar að því að virða hvert annað, vera víðsýn og meðvituð um það sem við segjum og gerum. Þá mun okkur örugglega takast að uppræta þennan fortíðardraug sem kynjamismunun er.

HALLÓ HEIMUR! -ég saknaði þín...

Þá er ég loksins komin með tölvu og nettengingu, eftir fjögurra mánaða rangl á milli rándýrra netkaffihúsa og óstabílla bókasafnstölva. Vonandi eruð þið ekki öll búin að gleyma mér! Ég ætla allavega að vera dugleg við að minna á mig hérna, and that's a promise.

Toodles!

Til ykkar allra, elskurnar mínar...

ég vona að þið séuð búin að njóta jólanna og alls sem þeim tilheyrir. Takk fyrir gamla árið líka, og vonandi fer nýja árið vel með ykkur... og munið umfram allt; verið góð við hvert annað!

xoxo

Arg!

Mér tókst með einstakri lagni minni að henda öllum bloggaralinkunum út. Man ekki alla linkana, svo þið bloggarar megið endilega senda mér urlin ykkar.

Takk takk.

Helgin

Lenti í veseni í Boston af því að vegabréfið mitt var ekki nógu tæknilegt fyrir þá, sem sagt ekki með segulrönd. Eftir að hafa tekið tvö sett af fingraförum og tvær myndir var settur bleðill í passann minn sem á stendur að ég megi fara til baka í gegnum Boston en síðan ekki söguna meir fyrr en ég er búin að update-a.

Munaði litlu að ég missti af tengifluginu til Halifax út af ruglinu. Þegar upp í þá vél kom settist hjá mér maður um fertugt, angandi af áfengi og sagði eitthvað sem svo; "Well, it's not what I'm used to but I guess it will have to do". Hvort hann átti við að hann væri svona merkilegur og vanur að ferðast á fyrsta farrými veit ég ekki, en sem betur fer var flugþjónninn svo vænn að bjóða manninum annað sæti þar sem fátt var í vélinni, svo ég fékk bæði sætin fyrir mig.

Lenti í Halifax fyrir miðnætti í gærkvöldi og var fagnað af hundi og börnum. Fór seint að sofa en vaknaði snemma, enda klukkan að nálgast hádegi á mínum tíma. Dagurinn í dag hefur svo farið í jólagjafasjopperí sem gekk reyndar vonum framar fyrir utan geðbilaða umferð, enda kann enginn að keyra lengur (nema auðvitað ég) ...ásamt heimsókn í Bangz, sem var auðvitað hápunkturinn!

Í kvöld á svo að fara út að borða og svo er bara eftir að klára að pakka öllu draslinu og stelpunum niður í töskur og halda til baka til Íslands á morgun.

Af hverju lítur nýja Birgittu dúkkan út eins og Rut Reginalds eftir plöstun?

Hvernig væri að gera dúkku af Kristjáni Jóhanns í fullri stærð? Hún gæti kostað 700 þúsund og allur ágóði runnið til hans sjálfs. Kannski væri hægt að útbúa hana þannig að hún syngi... hugsið ykkur bara, þú potar í ístruna á honum, munnurinn opnast og út flæða óperur og aríur á 120 desíbela styrk!

Þannig gætum við sveitalúðarnir allir eignast okkar eigin eintak af honum Kristjáni okkar.

Ég held barasta, þó ég segi sjálf frá, að þetta sé besta hugmynd síðan prumpublaðran var fundin upp!

Helgin

Óþol vikunnar: Gísli Marteinn, sem tókst að snúa potentially innihaldsríku viðtali við Harry Bellafonte upp í eitthvert ámátlegt píkufliss. "Hvað segirðu, hringdirðu bara í Mækol Djakkson sísona... vá... hahahahahaha".

Maður vikunnar: Pálmi Gestsson, fyrir að ná mér alveg niður í gólf af hlátri með túlkun sinni á Halldóri Ásgrímssyni. "Þakka ykkur fyrir bananana".

Ljóska vikunnar: Birgitta Haukdal sem kynnti nýja 'Birgittu dúkku'.

Gubb vikunnar: Kristján Jóhannsson sem sagðist finnast dúkkan heldur lítil.


Adios í bili.

15 ára endurhittingur úr Þinghólsskóla

Reunionið um síðustu helgi var algjörlega frábært. Þarna voru tæplega 50 manns mætt, sem verður að teljast gott þó auðvitað hefði maður viljað hitta fleiri... já barasta alla!
Þarna var borðað, drukkið, dansað og auðvitað skrafað heil ósköp. Fólk var mismunandi mikið (lítið) edrú, og undir restina voru flestir eiginlega bara ekkert edrú lengur... eða svoleiðis ;)

Ég er ekkert að fara út í nánari útlistanir á þessu kvöldi, en hún Kollý gerir því góð skil á sínu bloggi.

Það er allavega ljóst að planleggjarar þessa hittings eiga feitt hrós skilið!

-Og maður er strax farinn að hlakka til þess næsta, sem verður að öllum líkindum eftir fimm ár.

Lengi getur vont versnað

Mig langar til að nota hér tækifærið og votta um hálfri bandarísku þjóðinni, sem og heiminum öllum samúð mína vegna endurkjörs Herra Runna. Til ykkar hinna sem kusuð þennan ófögnuð yfir ykkur; gott á ykkur!