Gleðilegt ár

...elskurnar mínar og takk fyrir allt bara.

Ég get ekki sagt að síðasta ár hafi verið eitt af mínum uppáhalds, en er staðráðin í að þetta nýja verði þeim mun skemmtilegra.

Það sem stendur uppúr er þó ekkert til að grenja yfir:

* mótorhjólapróf og margir frábærir hjólatúrar
* ómetanlegir dagar í Veiðivötnum með Ernu minni
* helganga á 24 tinda sem saman mynda Glerárdal - á 25 tímum
* og auðvitað fyrstu skrefin í háskólanum

Ekki má gleyma þessu yndislega sumri sem var klárlega það besta (í veðurfræðilegum skilningi) sem ég hef upplifað.

So; ready - set - go! ...og farið varlega :)

*Andvarp*

Mér finnst ég bara verði að blogga þó ég hafi ekkert sérstakt að segja. Síðasta prófið var í dag, eftir viku sem einkenndist af veikindum (minna og allra dætranna) og lack of motivation. Er samt nokkuð viss um að ég náði öllu svo nú fer ég reynslunni ríkari inn í næstu önn sem byrjar um miðjan janúar.

Skrýtin tilfinning sem fyllti magann á leiðinni heim eftir prófið. (Mig langar að segja tómleiki, en getur tómleiki "fyllt" magann? ) Allt í einu vantaði mig einhvern sem biði heima og ég gæti hoppað upp um hálsinn á til að fagna þessu öllusaman.

Skrýtið.

Og allt í einu verður maður eitthvað væminn (og ekki einu sinni byrjuð á rauðvíninu sem ég var búin að lofa mér)

When do you plan to kill yourself?

Eftirfarandi spurningar eru úr "The Feeling Good Handbook" og eiga að gefa vísbendingu um hvort sá sem svarar sé í áhættuhóp fyrir að stytta sér aldur.

1. Have you been feeling sad or unhappy?
2. Do you ever feel hopeless?
3. Do you ever have thoughts of death or think that you would be better off dead?
4. Do you have any urge to kill yourself?
5. Do you feel you can resist these impulses or do they sometimes tempt you?
6. Do you have any actual plan to kill yourself?
7. When do you plan to kill yourself?
8. Is there anything that would hold you back suck as your family or religious convictions?
9. Have you ever made a suicide attempt in the past?
10. Would you be willing to seek help or talk to someone if you ever felt desperate?

If a person answers "yes" to any number of these questions, the threat of suicide may be imminent.

Ég meina... hvers vegna að gera einfalt mál flókið?

Tvífarar

Þessir tveir fréttamenn eiga fleira sameiginlegt en starfið.

Til dæmis þetta einlæga bros.

Í dag eru...

17 dagar í fyrsta prófið

28 dagar í síðasta prófið

31 dagur til jóla

38 dagar eftir af árinu 2007

... er eitthvað skrýtið að maður sé *smá* kvíðinn? :oI

(Langar ekki einhvern að bjóða mér í æðislegt áramótapartý? :)

Vísindaferð

Ég fór í mína fyrstu vísindaferð í gær! Missti af einni í haust... vissi ekki að það væri takmarkaður fjöldi og svona líka umsetið að listinn var fullur samdægurs.

Nema hvað... ferðinni var í þetta sinn heitið á Hrafnistu (já, elliheimilið). Þar var okkur laumað inn til að við trufluðum nú örugglega ekki heimilisfólkið, upp á þriðju hæð og inn í sal þar sem okkar biðu veitingar í föstu og fljótandi formi og af ýmsum styrkleikum. Góður fyrirlestur frá tveimur starfandi félagsráðgjöfum við stofnunina og svo létt spjall og gleðskapur á eftir.

Það fyndnasta við þessa ferð var eiginlega það, að í slideshow-inu sem við fengum voru meðal annars myndir af gamla fólkinu að dansa og skemmta sér á bjórkvöldi í þessum sama sal. En þarna urðum við að læðast með veggjum til að þau yrðu okkar örugglega ekki vör.

Ætli þeim hefði ekki verið sama þó við hefðum aðeins heilsað upp á þau í leiðinni? :)

unravel

while you are away
my heart comes undone
slowly unravels
in a ball of yarn
the devil collects it
with a grin
our love
in a ball of yarn

he'll never return it

so when you come back
we'll have to make new love

Gleðilegan vetur

Mér fannst fyrsti vetrardagur reyndar tekinn full hátíðlega, þó snjórinn hafi vissulega lífgað upp á skammdegið. Í 'myndir' hérna til hægri má finna nokkrar frá helginni.

Dásamleg frétt

(Til að fyrirbyggja allan misskilning skal tekið fram að þetta var ekki ég)

"Lögregla var kölluð að fjölbýlishúsi í Kópavogi upp úr miðnætti, þar sem kona var út á svölum og öskraði. Hún tjáði lögreglumönnunum að hún birgði svo mikla reiði inni í sér að hún yrði að öskra, hverju sem tautaði og raulaði.

Lögreglumennirnir höfðu skilning á því og buðu henni í bíltúr út fyrir bæinn til að klára málilð, sem hún þáði. Eftir að hafa öskrað nokkra stund uppi í Heiðmörk, var hún tilbúin til að fara heim að sofa, og hefur ekki verið kvartað meira undan henni síðan."

(af visir.is)

Vá, vá, vá...

Ég komst að því í gær að ég er ekki orðin nógu gömul til að sitja og hlusta á tónleika. Hefði kunnað betur við mig í þvögu uppvið svið þar sem ég hefði allavega getað hreyft mig aðeins í takt. Það er bara eitthvað kjánalegt við að sitja kyrr á rassinum og hlusta á tónlist sem maður er á annað borð að fíla í botn.

Tónleikarnir voru engu að síður tær snilld! Megas í góðu formi og þvílíkt safn af listamönnum sem spiluðu með honum... vaaaaaá. Númer eitt var Guðmundur Péturs á gítar og hólí krapp hvað hann var góður. Restina skipuðu meðlimir Hjálma sem eru auðvitað allir snillingar.

Jólanáttburður

Vælir útí
Veðr' og vindum
Vetrarnætur-

Langt meðan
Ljótir kallar
Liggja mömmu

Og pabbi'í druslum
Dauð'r í kompu'
Úr drykkju liggur

Hlandbrunnið
Braggabarn
Í barnavagni

Love is in the air...

Sumir segja að haustið sé rómantískasta árstíðin með sína fallegu liti og rjóðan kvöldhiminn. Þetta sannaðist í morgun, þegar ég vaknaði við þennan fallega ástarsöng fyrir utan gluggann.

Maður fær bara tár í augun.

Maður getur ekki verið heppinn alltaf

Fór með Súkkuna í skoðun. Alltaf smá taugatitringur þegar maður situr á kaffistofuni og horfir á gaurinn þjösnast á henni... skyldi hún sleppa? Skyldi ég þurfa að punga út einhverjum tíuþúsundköllum í nýtt púst? Nýja dempara? *svitn*

Slapp án athugasemda í fyrra en var ekki eins heppin þetta árið. Það er ljóst að ég neyðist til að verlsa nýja peru í annað parkljósið að framan.

Frjáls framlög vel þegin.

Myndir...

Nokkrar haustmyndir komnar í albúmið hér til hægri -->>

Í skólanum, í skólanum...

er skemmtilegt... og skrýtið, og scary, og spennandi, og stressandi að veeraaa.

Þriðji dagurinn í dag og ég sit hér inni í kaffiteríu í Þjóðarbókhlöðunni... sem ég hef bæ ðe vei aldrei áður stigið fæti inná. Sit og skrifa og hleð tölvuna fyrir næsta tíma. Háskólalífið einkennist mjög af ráfandi fólki í leit að innstungum til að hlaða lappana sína, enda flestir búnir að leggja stílabækurnar á hilluna, þó þær sjáist alveg ennþá. Ég passa mig allavega á því að hafa eina slíka í töskunni ef einhverjir tæknilegir örðugleikar skyldu poppa upp.

Á þessum þremur dögum hefur mér tekist að koma mér upp vöðvabólgu (held hún hafi reyndar byrjað á sunnudaginn). Mig grunar líka að ég sé að læra meira en gengur og gerist. Ætla að glósa uppúr lesbókunum og enda á því að þýða heilu kaflana. Svo lærir maður á þetta og verður smám saman skipulagðari; lærir ekkert fyrstu vikurnar og svo allt á þremur vikum fyrir próf :Þ

Hvað nú?

Í dag er föstudagurinn 31. ágúst. Í dag er ég rúmlega 34 ára. Í dag eru 12469 dagar síðan ég leit fyrst dagsins ljós. Hvert er ég að fara með þessu?

Well.

Í dag fann ég grátt hár. Í mínu eigin rauðbirkna höfði.

Ég veit ekki alveg hvernig mér á að líða. Er þetta bara að verða búið? Get ég bara pakkað saman, og kvatt þennan heim? Slökkt ljósin, skellt í lás og hent lyklinum?

Ég veit ég má ekki láta bugast. Vera sterk og reyna að horfa björtum augum fram á við. Það er það sem blívur á svona stundum.

Jæja...

Sumum finnst leiðinlegra í baði en öðrum.

Ég er byssa á bakka

Ég get ekki setið á mér að pósta inn þessa snilld af Barnalandi. Eftir fréttir um Fisher Price leikföng sem voru innkölluð, ákvað þessi kona að senda tölvupóst til fyrirtækisins. Hún gerði uppkast á ensku og bað um ritskoðun þar sem hún væri ekki nógu sleip í enskunni:

"Hello
i am from Iceland and I don not speak very good English but I am gun a tray :)
I by a toy in Iceland from fisher price ,,little people,, and dora explorer and this toy are maid in China 2002-2007.
One Dora explorer vas bay in Spain and made 2002 (the small one) and the big one I think in Iceland but I am not sure made 2003.
Are something wrong this toy or?????
What can I do??
Can I talk to some body in Iceland so I can anther stand this better????

I hope you can anther stand what I am writing :)
And thank you

Respectfully
xxx"

Einn snillingurinn á BL þýddi herlegheitin yfir á íslensku:

"Halló,
Ég er frá Íslandi og ég er mafíuforingi sem talar ekki mjög góða ensku, en ég er byssa á bakka.
Ég er hjá leikfangi á Íslandi frá Fisher Price, litla fólk og Dóra landkönnuður og þetta leikfang er þjónustustúlka í Kína á árunum 2002-2007.
Ein Dóra landkönnuður var strönd á Spáni og náði 2002 (sú litla) og um þá stóru hugsa ég á Íslandi en er ekki viss um að hafi náð 2003.
Eru eitthvað að þessu leikfangi eða?????
Get ég talað við eitthvað lík á Íslandi svo ég geti anther staðið þetta betur?????

Ég vona að þú getir anther staðið það sem ég skrifa :)

Virðingarfyllst,
xxx"

Áts

Fór á mótorhjólinu í Kjósina í dag í mínu mesta sakleysi. Steig af hjólinu á áfangastað og teigði úr mér og fann þá sting í handlegginn. Hugsaði með mér að líklega hefði þetta verið eitthvað á olnbogahlífinni í jakkanum og spáði ekki í það meir.

Settist inn með gömlu hjónunum og fékk kaffi og meððí og fannst ég eitthvað skrýtin í handleggnum. Hann orðinn rauður og aumur... það skyldi þó ekki vera?

Tók jakkann minn og hristi ermina og hvað haldiði að hafi dottið niður úr henni á gólfið?

Núna á Gulli Geitungur heima í rotþró uppi í Kjós. Honum var nær.

Hlýnun jarðar

Heima, sæta heima...

Næst þegar ég fæ geðveika hugdettu eins og t.d. að ganga á 24 fjöll á sólarhring, vill einhver vinsamlegast loka mig inni þangað til mér snýst hugur. -Takk.

Enívei, ég er komin niður... í heilu lagi eða því sem næst. Þessi ganga var klárlega mesta líkamlega og andlega þolraun sem ég hef gengið í gegnum. Hvannadalshnjúkur var lautarferð í samanburði!

Við lögðum af stað klukkan hálf níu á laugardagsmorgni í svartaþoku, en gengum uppúr henni á fyrsta klukkutímanum. Eftir það vorum við í sólskini í heilan sólarhring. Sólin rétt tyllti sér undir hafflötinn í augnablik áður en hún reis aftur og maður ber þess augljós merki í dag, vel steiktur þrátt fyrir sólarvörn!

Gangan sjálf var... tjah, hvað get ég sagt... hryllingur? Við gengum til skiptis í lausum stórgrýtis skriðum þar sem hvergi var fast undir fótum, meira að segja stóru björgin fóru af stað þegar maður steig á þau... og blautum snjó. Við fórum með fjallshryggjum þar sem hægt var, og þegar maður klöngraðist í skriðunum með þverhnípi á báðar hliðar, þá setti maður upp ímyndaða vagnhestaleppa og þóttist ekkert sjá. Leit hvorki upp né niður, en var þeim mun uppteknari af tánum á sér. Víða þurftum við líka að klöngrast í snarbröttum klettum með sama ótrausta undirlendið undir fótum. Ekki uppáhalds aðstæður þeirra sem þjást af lofthræðslu (*réttupphönd*). Snjórinn gerði það svo að verkum að allir voru orðnir blautir í fætur fljótlega eftir að við lögðum af stað þrátt fyrir legghlífar og minnkafeiti, og eftir það gengum við með polla í skónum í 20 tíma. Í lokin var þreytan orðin svo mikil að ef ég settist niður á stein til að hvíla mig þá dottaði ég, og þá voru enn 15 km eftir. En á einhverjum yfirnáttúrulegum viljastyrk sem ég vissi ekki að ég ætti til, komst ég alla leið.

Þegar við loksins komum niður 25 tímum eftir að við lögðum í hann, tók björgunarsveitin Súlur á móti okkur með heitu kakói og kringlum og svo var okkur skutlað að bílunum sem við höfðum skilið eftir við Skíðahótelið hinum megin í dalnum. Ég brunaði niður á tjaldstæði í sturtu, henti mér inn í tjald í 4 tíma og lagði svo af stað í bæinn.

Merkilegt nokk þá slapp ég með tvær blöðrur á tánum og mar á ökklanum eftir vinstri skóinn. Smá strengi og massívan sólbruna.

Tvennt stendur uppúr eftir þessa mögnuðu göngu; góður félagsskapur og stórkostlegt útsýni. Myndir má finna í link hér til hægri og ég mæli með að stilla á slideshow þar sem þær eru nokkuð margar.

Labbi-labb... og meira labb

Jæja, senn líður að göngunni miklu. Ætla að dóla mér norður á morgun og vona að ég fái tjaldstæði, en það er víst íþróttamót á Akureyri akkúrat núna um helgina. Í versta falli sefur maður bara í bílnum.

Gangan hefst klukkan 8:00 á laugardagsmorgun og er reiknað með að henni ljúki um svipað leiti á sunnudagsmorgun. Gengnir verða 24 tindar (að meðaltali einn tindur á klukkutíma), leiðin er tæpir 50 km. og samanlögð hækkun um 4000 metrar (u.þ.b. tveir Hvannadalshnjúkar).

Ég veit eiginlega ekkert hvað ég er að fara útí, svo það verður bara að koma í ljós hvort ég næ að klára þetta :)

Fólki er allavega í sjálfsvald sett hversu langt það fer og verður ferjað niður í byggð ef á þarf að halda.

Nú er bara að vona að hann hangi þurr og maður fái þokkalegt skyggni yfir þessar fallegu sveitir þarna í kring. Ekki spennandi tilhugsun að ganga í 24 tíma í þoku.

Frekari fréttir fylgja eftir helgi og vonandi ein eða tvær myndir líka :)

Önnur sólbaðssaga

Ég fór í Nauthólsvíkina eftir vinnu í dag til að ná síðustu sólageislunum.

Ligg þar eins og skata á teppinu mínu þegar ég heyri ég í litlum strák koma labbandi með pabba sínum. Stákurinn kemur nær og er eitthvað að skoða mig og svo heyri ég eftirfarandi:

Pabbinn: "Þetta er allt í lagi, hún er bara í sólbaði"
Stráksi: "Hún er lifandi...?"
Pabbinn: "Jájá, hún er lifandi"

Svo rölta þeir feðgar sinn veg...

Það er komið sumar

Ég tók mér frí eftir hádegi einn dag nú í vikunni og ákvað að skreppa út í Öskjuhlíð. Finnst ósköp notalegt að liggja þar ein og sleikja sólina þegar vel viðrar.

Svo ég arka af stað með teppið mitt og finn mér góðan stað þarna í trjálundi. Þar sem ég ligg og dorma kemur allt í einu maður gangandi. Hann hikar eitthvað en heldur svo áfram og hverfur á milli trjánna. Ég lét mér fátt um finnast, þrátt fyrir að hafa heyrt margar perrasögur úr þessari sömu hlíð. Maðurinn leit ósköp sakleysislega út, snyrtilegur til fara í skyrtu og jakkafatabuxum.

Nema hvað, eftir nokkrar mínútur kemur hann aftur og leggst nú niður á teppi þarna rétt hjá mér. Mér fannst þetta jú, dálítið skrýtið en spáði ekki meira í það enda steikjandi sól, hlý gola og hrossagaukar hneggjandi um háloftin.

Eftir dálitla stund er ég að snúa mér við á teppinu og verður litið á manninn... sem liggur þá þarna á teppinu sínu allsnakinn...!

Ég leit undan og vonaði að ofbirtan hefði ekki valdið mér rafsuðublindu, enda maðurinn eins og risastórt endurskinsmerki. Svo smeygði ég mér í skóna, tók teppið mitt og fann mér annan stað fyrir sólbaðið, á aðeins opnara svæði.

Einhver spurði mig hvort ég hefði ekki verið neitt smeyk? En þar sem ég stóð full klædd og horfði niður á berrassaðann drenginn, get ég ekki sagt að mér hafi þótt stafa nein hætta af honum. Sjálfsagt var honum bara heitt :)

Hjálmar og hjálmar

Fór á snilldar tónleikar á Nasa í gær þar sem Hjálmar tróðu upp ásamt KK og Megasi. Hjálmar voru hrikalega góðir og spiluðu allan tímann. KK var frábær og Meistarinn sjálfum sér líkur. Megas spilaði reyndar allt of stutt, ekki nema hálftíma eða svo, en hann var þó í góðu formi (á Megasar mælikvarða) og þessi hálftími var vel nýttur :)

Rúllaði svo á hjólinu í dag austur að Geysi þar sem bifhjólafólki var boðið í kaffi og með'ðí. Yndislegt veður, en trufluð umferð í bæinn.

Talandi um hjálma... þið vitið hvernig framrúðan verður á keyrslu úti í sveit á sumrin. Well, þið ættuð að sjá hjálminn minn eftir hjólatúrinn í dag *bjakk!*

Tilkynningaskyldan

Ég vil byrja á að biðjast afsökunar á vanrækslunni, en í staðinn skal ég koma með fullt af fréttum til að bæta ykkur tilfinningalegt tjón.

Í fyrsta lagi... ég er ólétt. DJÓÓÓÓÓK!!

Ok, ég er hætt að stríða. Hér koma fréttirnar:

* Sótti um í Háskóla Íslands
* Komst inn!
* Sótti um í Stúdentagörðunum (allir að krossleggja fingur)
* Sótti um námslán
* Byrja í haust, nánar tiltekið 3. september í Félagsráðgjöf; 3 ár í BA og 2 í viðbót í Master til starfsréttinda.

Það fer sumsé að líða að því að ég kveðji Össur hf. Ekki laust við trega enda margt frábært fólk þar sem ég mun sakna. Stefni samt á að vinna í jóla- og sumarfríum svo ég fæ smá aðlögunartíma... eða frálögunartíma?

Við tekur nýr og spennandi tími (viljið þið minna mig á að hafa sagt þetta þegar ég verð hérna grenjandi yfir prófunum) og ég hlakka til!

Rakst á þessa snilld á öðru bloggi

Stuttar bækur:

Fölskvalaus iðrun - eftir Árna Johnsen
Stjórnmálaflokkar sem ég á eftir að prófa - eftir Kristin H. Gunnarsson
Tískuhandbók tölvunarfræðingsins
Hlutir sem ég hef ekki efni á - eftir Björgúlf Thor Björgúlfsson
Villtu árin - eftir Geir H. Haarde
Hvernig halda skal formannssæti - Össur Skarphéðinsson
Félagatal Framsóknarflokksins
Kúnstin að vera krúttlegur - eftir Gunnar Birgisson
Vinsælustu lögfræðingar landsins
Hvernig á að bjóða útlendinga velkomna - eftir Jón Magnússon
Hafarnaruppskriftir - Náttúruverndarsamtök Íslands
Þingmannsárin - eftir Jón Sigurðsson
Það sem mér líkar vel í fari framsóknarmanna - eftir Steingrím J. Sigfússon

Súkkusafnarinn

Nýr fjölskyldumeðlimur hefur bæst í hópinn. Suzuki Savage 650cc '87. 20 ára gamalt dekurhjól sem hlýtur að teljast ágætis byrjun :)

Labbilabb

Vaknaði klukkan sex og gekk á Þverfellshornið. Hélt svo áfram sem leið liggur austur eftir Esjunni og alla leið yfir í Kjós. Veðrið var eins og ég hefði pantað það og útsýni til allra átta. Labbið tók 5 og hálfan tíma, 18,5 km leið.

Endaði í bústaðnum hjá gamla settinu og fékk kaffi og meððí áður en pabbi skutlaði mér til baka að bílnum.

Frábært labb, en í dag er einmitt ár frá því ég gekk á Hvannadalshnjúk.

Setti inn myndir frá þessum fallega degi ->>

Stereótýpur

Ég kíkti í Smáralindina áðan, þar sem Sniglarnir enduðu sína árlegu 1. maí keyrslu. Hvorki meira né minna en 670 hjól mættu á planið og fljótlega fylltist húsið af mótorhjólastrákum og stelpum.

Þegar ég labbaði fram hjá nammi.is var þar biðröð fram á gang, sem samanstóð af leðurjökkum, hauskúpum, tattúum, keðjum og hausklútum... allir að kaupa bland í poka ;)

Skemmtilegt próf

Ertu stelpustrákur eða strákastelpa?

Ég fékk 180 stig.

"Stigagjöf frá 150 til 180 ber vott um sveigjanleika í hugsun hjá báðum kynjum eða fótfestu í herbúðum beggja. Þessir einstaklingar sýna hvorki ákveðnar hneigðir til karlmiðaðrar né kvenmiðaðrar heilastarfsemi og eru venjulega sveigjanlegir í hugsun sem er vitaskuld afbragðs eiginleiki fyrir alla sem þurfa að leysa vandamál. Þeir hafa og tilhneigingu til að vingast bæði við karla og konur."

Gleðilegt sumar!

Og takk fyrir veturinn, sem var nú svosem ekki mikill vetur.

Veðrið er yndislegt, sem hlýtur að lofa góðu. Svo fraus vel saman í nótt, var 5 stiga frost þegar ég fór á fætur klukkan sex.

Fannst tilvalið að byrja sumarið á því að labba á Esjuna. Hafði ekki heimsótt hana síðan í fyrravor.

Setti inn nokkrar myndir...

Easter Bunny from Hell

Og stelpan brosir bara!

Gleðilega Páskegga

Hér átu allir yfir sig af súkkulaði eins og vera ber. Mæli með hvítu eggjunum frá Góu (sem reyndar þarf að sérpanta) fyrir þá sem vilja breyta til.

Nokkrar myndir frá helginni í albúminu hérna hægra megin.

*knús*

Sólin skín...

Lóan er komin, krókusarnir byrjaðir að springa út fyrir utan gluggann hjá mér, og það án þess að ég hafi orðið vör við að nokkur vetur kæmi? 2-3 snjóskvettur sem fóru jafnfljótt og þær komu.

Er hægt annað en að brosa með sjálfum sér á góðum degi og láta sig dreyma allt sem sumarið hefur í vændum :)

Djö...

Og engin mynd af sparibauknum.

Af hverju ekki?

Af hverju ekki að vana kynferðisafbrotamenn? Þegar maður brýtur af sér á þennan hátt, ítrekað og engar meðferðir eða refsingar bera árangur?

Það telst víst brot á mannréttindum einstaklingsins, en hvaða réttindi hefur maður sem eyðileggur líf annarra markvisst til að svala afbrigðilegum hvötum sínum? Ef til er leið til að bæla þessar hvatir, hvers vegna er þeim ekki beitt og hvers vegna fá þeir aftur og aftur tækifæri til að brjóta af sér? Hver eru mannréttindi þeirra einstaklinga sem dæmdur kynferðisafbrotamaður á eftir að brjóta gegn þegar hann er búinn að sitja af sér?

Er maður sem misnotar börn ekki búinn að fyrirgera sér réttinum til að eignast sjálfur börn? Og er sá sem nauðgar ekki búinn að fyrirgera sér réttinum að fá að stunda kynlíf yfir höfuð?

Þungir þankar á sunnudagsmorgni. Farið vel með ykkur.

Ja hérna

Ég mæli með því að þið horfið á þetta til enda.

Scary? -Fokkin 'eh!

Haustmyndir

Setti nokkrar nýlegar myndir í albúmið hérna til hægri.

32:24

Eru til fallegri tölur í heiminum? Ekki á þessum mánudegi.

Óumdeilanlega flottasti handbolti sem ég hef séð á ævi minni.

Vá.

Þorrinn byrjaður

Alveg er mér fyrirmunað að skilja hvernig fólk getur lagt sér þetta til munns, hvað þá fundist það girnilegt eða gómsætt.

Held ég haldi mig bara við harðfiskinn, flatkökurnar og annað sem ég þarf ekki að "horfast í augu við".

Ekki örvænta

Flestir hafa örugglega orðið varir við veikindafárið síðustu vikur, ef þeir hafa þá ekki sjálfir lagst í bælið.

Annar hver maður hefur legið með hor og hausverk og margir gubbandi í ofanálag. Tveir sem ég þekki lágu í rúminu í þrjár vikur!

Í ljósi þessa fannst mér skondið að lesa eftirfarandi frétt á visir.is í gær:

"Flensan hefur enn ekki stungið sér niður, en læknar segja varla langt að bíða hennar, enda komi hún yfirleitt á þessum árstíma".

Þannig að fyrir ykkur sem voruð skilin útundan (eins og ég), er ennþá von til að ná sér í nokkur míkróskópísk gæludýr.

Ó, nei... ekki KONUR!

Sá frétt í dag á mbl.is þar sem Vatíkanið gagnrýnir Dakar rallíið og meint ábyrgðarleysi aðstandenda þess. Í fréttinni kemur meðal annars fram að "...alls hafa 54 látist í tengslum við keppnina frá upphafi, þar á meðal eru átta börn og tvær konur."

Ókey, ég skil alveg að það sé tekið sérstaklega fram að börn hafi verið þarna á meðal. En af hverju konur? Af hverju er hvergi minnst á að x margir karlar hafi látist?

Þetta er auðvitað bara eitt af milljón svona dæmum þar sem setningin "konur og börn" hefur glumið í eyrum.

Ég get ekki lesið annað út úr svona frétt en að það sé mun hræðilegra að kona láti lífið en karl. Er það meint varnarleysi okkar sem gerir okkur að svona miklum fórnarlömbum?

Maður spyr sig...

Nú árið er (næstum) liðið...

Jæja, nú líður senn að lokum þessa annars ágæta árs, og nýtt og ferskt tekur við í staðinn.

Í tilefni þess ætla ég að biðja alla að skrifa besta eða skemmtilegasta ráðið við þynnku sem þeir kunna í kommentaboxið :)

Takk fyrir samfylgdina á árinu og vonandi hef ég frá einhverju skemmtilegu að segja á því næsta.

Skemmtið ykkur vel á gamlárskvöld og farið varlega!

Blaðrarinn

Gleðileg jól elskurnar mínar! Munið að slaka á og njóta þeirra, borða vel, hvílast og vera góð hvert við annað.

*Jólaknús*

Ert´í fýlu?

Selma gladdi mig með þessu skemmtilega myndskoti :)

Hiksti - Sönn saga

Strákur og stelpa eru á labbi um kvöld niðri í bæ. Kaupa sér pizzu og smjatta á henni upp úr boxinu.

Þegar þau hafa étið nægju sína, spyrja þau gaur sem þarna var á labbi hvort hann vilji klára pizzuna. Hann hélt það nú og þau labba áfram.

Strákurinn fær hiksta.

Þar sem þau eru á rölti mæta þau aftur gaurnum sem þau gáfu pizzuna. Sá var víst bæði stór og kraftalega vaxinn... víkur sér að stráknum og segir í ásökunartón: "Þú tókst veskið mitt!"

Stráksi þrætir fyrir en hinn æsist allur upp og er á endanum farinn að öskra á hann:"Komdu með veskið mitt!!"

Stráknum leist ekkert á blikuna (orðinn skíthræddur) og sá að þetta stefndi aðeins í eitt; blóðug slagsmál, þar sem það yrði að öllum líkindum hann sjálfur sem leggði til blóðið.

Gellur þá í gaurnum, sem skyndilega var orðinn pollrólegur: "Er hikstinn farinn? -Vissi það... virkar alltaf!"

:D

Eilífur Friður?

Mikið líst mér vel á þessa hugmynd.

Finnst alveg fáránlegt að einhverjir jakkafataplebbar geti tekið sér það bessaleyfi að ætla að ákveða hvað annara manna börn megi og megi ekki heita.

Fyrir utan það að miðað við þau nafnaskrípi sem maður heyrir að fólk sé að gefa erfingjum sínum, þá er þessi blessaða nefnd nú ekki að skila miklum árangri.

Verst að eiga ekki strák... hann gæti heitið Ljótur Ormur.

Myndir...

Henti loksins inn nokkrum myndum frá Quebec, svona áður en Rósa fer alveg á límingunum ;)

Þetta eru myndir frá Halloween vikunni og svo Iron Maiden tribute tónleikunum frægu.

Ó mæ

Komin heim eftir vægast sagt skrautlegt ferðalag. Flaug frá Quebec til Montréal, og svo Boston þar sem við höfðum nokkra klukkutíma til að skoða okkur um í borginni. Svo var það lokaflugið til Íslands, sem lagði af stað tímanlega um kvöldið.

Eftir fjögurra tíma flug til Keflavíkur var ekki hægt að lenda vegna veðurs og var ákveðið að hringsóla og sjá hvort vindinn lægði. Eftir klukkutíma hringsól var stefnan tekin á Glasgow þar sem allir þurftu að taka farangurinn sinn og bíða frekari frétta í flugstöðinni. Þetta var klukkan hálf níu á sunnudagsmorgni. Við gátum ekkert farið þar sem við máttum ekki tékka töskurnar inn og verið var að bíða eftir nýrri áhöfn frá Íslandi þar sem áhöfnin okkar fór beint upp á hótel í hvíld.

Klukkan sjö um kvöldið lögðum við af stað til Íslands og lentum loks í Keflavík um tíuleitið.

Og allur farangurinn varð eftir í Glasgow og hefur ekki enn skilað sér.

Til að kóróna allt gaf ég upp gemsanúmerið mitt til að hringja í þegar töskurnar koma. Gemsinn batteríislaus og hleðslutækið í töskunum!

En hey, ég er allavega komin heim :)

Hallo-vin

Jaeja, tha eru thessar tvaer vikur i Quebec City ad verda bunar -sidasti vinnudagurinn i dag. Thetta er buid ad ganga mjog vel og allir sattir vid arangurinn held eg.

I gaer var Halloween party i vinnunni. Allir maettu i buningum og voru i theim allan daginn og svo var bjor og pizza eftir vinnu. Thad bjost vist enginn vid thvi ad vid Islendingarnir maettum i buningum svo vid voktum mikla lukku... myndir seinna :)

Okkur hefur reyndar ekki tekist ad heimsaekja gamla borgarhlutann enntha i dagsbirtu. Aetludum ad fara um helgina en tha var havadarok og larett rigning (ekta islenskt). Svo vid eyddum helginni innandyra (moll=innandyra).

Svo verdur lagt af stad heimleidis i fyrramalid. Vid thurfum ad taka thrjar flugvelar, fyrst til Montreal, svo Boston og thadan heim. Bleh!

Thad er nu samt alveg thess virdi, enda er thetta ordid agaett i bili og verdur gott ad koma heim. Ad bua a hotelherbergi i tvaer vikur og borda uti a hverju kvoldi er ekki eins skemmtilegt og thad gaeti kannski hljomad.

Nu langar mig bara i rumid mitt og fiskibollurnar hans pabba!

-Og audvitad othaegdar-englana mina :)

Melding

Migandi rigning i Quebec City i dag. Reyndar buid ad rigna mestallan timann sidan eg kom. Fengum tho thurrt a pobbaroltinu i gaer.

Forum a Iron Maiden tribute tonleika med mognudu bandi sem kallar sig Power Slaves. Their toku Maiden betur en Maiden sjalfir! ...eda thannig.

Dagurinn i dag var svo notadur i ad sjoppa og svo a ad skoda gamla borgarhlutann a morgun, sem ku vera fallegur med eindaemum.

Fjarfesti i 10.1 megapixla myndavel svo madur aetti ad geta hent inn nokkrum myndum thegar heim kemur.

Au Revoir!

Oui Oui

Sit núna á hótelherbergi í Quebec City. -Heimili mínu næstu tvær vikurnar. Með í för eru þrír aðrir Össuringar og verða þessir dagar notaðar til að læra samsetningu og virkni á nýju hné og flytja það svo með okkur heim. Sem sagt; reyna að troða eins mikilli kunnáttu í kollana og hægt er á tveimur vikum og halda henni þar þangað til við komum heim.

Spennó.

Fyrir þá sem ekki vita er Quebec frönskumælandi svæði... reyndar það franskasta sem finnst í Kanada. Franskan sem hér er töluð er þó ekki alveg eins og sú sem töluð er í Frakklandi. Hér er framburðurinn miklu sterkari og orðaforðinn líkari því sem talað var í Frakklandi í gamla daga. Þetta segir frakkinn í hópnum allavega, sem bæ ðe vei kemur sér vel að hafa með í för þar sem enskukunnátta íbúanna er misgóð.

Það var samt fyndið að heyra afgreiðslukonuna segja við hann í dag; "you have a French accent" þegar hann talaði frönsku við hana.

Jeppaferð

Búin að setja inn nokkrar random myndir úr jeppaskreppinu í 'albúm' hérna til hægri.

:)

Litli óþægðarengillinn minn er sjö ára í dag.

Í tilefni dagsins kemur nýjasta gullkornið, frá í gær:

Við fórum í réttir upp í Mosfellsdal og ég notaði tækifærið til að kenna borgarbarninu mínu eitt og annað sem viðkemur kindum.

Ég: "Sko, kindurnar með hornin eru hyrndar"
Júlía: "Jaaaá"
Ég: "Og þær sem hafa engin horn eru kollóttar"
Júlía: "Nú? Ekki sköllóttar?"

Einn daginn gef ég út bók.

Jeppa skrepp

Fórum í alveg geggjaða jeppaferð með vinnunni í gær. Söfnuðumst í rúmlega tuttugu bíla og svo var keyrt Syðra-Fjallabak, komið niður Hungurfit austan við Tindfjallajökul og svo Fljótshlíðin til baka. Veðrið var algjörlega meiriháttar allan daginn, ferðin tók um tíu tíma og kvöldsólin fylgdi okkur síðasta spölinn heim.

Súkkan stóð sig ótrúlega vel og tók ár og sprænur léttilega, jafnt sem brattar sandbrekkur og skorninga. Við stelpurnar vorum auðvitað rígmontnar; á minnsta bílnum... og verandi stelpur innan um alla strákana á monster trukkunum sínum, sem sumir voru svo stórir að við hefðum næstum sloppið á milli hjólanna á þeim.

Frábær dagur sem lengir sumarið í annan endann.

Myndir á leiðinni.

Doh!

Þessa dagana stendur yfir nýtt prógramm hjá Júlíu, sem felst í því að hún sefur í sínu eigin rúmi en ekki uppí hjá mér. Þetta hefur bara gengið vel, en í gærkvöldi spurði hún mig hvort hún mætti sofa í mínu rúmi.

Ég: "Neeeeei, sofðu bara í þínu rúmi"
Júlía: "En af hverju?"
Ég: "Af því að þú tekur svo mikið pláss í rúminu mínu"
Júlía: "Mamma; hvort viltu pláss eða mig?"

Hún svaf uppí.

Draugar - humrar og haglabyssur

Gærkvöldið var hin mesta snilld. Ég fór með nokkrum vinnufélögum, ca. 20 manns á leirdúfuskytterí fyrir austan. Fengum tíu skot hvert og svo var dúndrað og puðrað og fagnað mikið þegar dúfurnar splundruðust. Það verða sumsé leirdúfur í jólamatinn á þessum bæ :)

Eftir skothríðina fórum við á draugasetrið á Stokkseyri, þar sem við hlustuðum á gamlar íslenskar draugasögur í viðeigandi umhverfi.

Síðan var haldið í humarveislu á 'Við fjöruborðið' og enginn svikinn af því. Átum þar til við stóðum á blístri og fylltum upp í holurnar með góðu hvítvíni.

Rúsínan í pylsuendanum var svo varðeldur niðri í fjöru í svartamyrkri. Það var blankalogn og hlýtt og auðvitað drukkið, dansað og sungið fram eftir nóttu.

Bara frábær ferð sem gleymist seint, og hefur hér með verið gerð að 'árlegum viðburði'.

Mynds

Myndir úr sumarfríinu í "Albúm" hérna til hægri. Fleiri væntanlegar þegar filman klárast.

P.s. ef einhver veit hvernig ég losna við þennan ljóta græna bakgrunn í albúminu, má sá hinn sami senda skiló!

Ó-Menningarnótt

Kíkti í bæinn í gærkvöldi um áttaleitið. Þá strax var nokkur fjöldi fólks farinn að veltast um í rennisteininum af áfengisdrykkju.

Byrjaði í GuSt á Laugarvegi þar sem tríóið Moskító (sem er hluti hljómsveitarinnar Moskvitsj) var að spila. Ein af þeim var hún Sandra og tóku þær nokkur þjóðlög héðan og þaðan frá Evrópu, á Selló, blokkflautu og rafmagnsgítar. Bara snilld.

Eftir þetta rölti ég niður í portið hjá 'Við Tjörnina'. Þar áttu að spila Fræbblarnir og Megasukk. Ég kom mér fyrir á góðum stað og þar stóð ég og kvaldist við að hlusta á Fræbblana glamra og gelta í svona þrjú korter. Þegar því var lokið var tilkynnt að nú yrði gert þriggja kortera hlé áður en Megasukk kæmu fram.

Svo ég skakklappaðist hálf heyrnarlaus og orðin frekar tæp á geði, aftur út í bíl og skrölti heim.

Þegar þarna var komið sögu var klukkan orðin tíu og drukknu unglingarnir farnir að detta um barnavagnana hjá fjölskyldufólkinu.

Þetta var því frekar skrýtin samsetning og súrrealísk stemmning sem einkenndi þetta kvöld.

Efast um að ég nenni á næsta ári... nema kannski Megasukk spili á UNDAN.

Hlaupi hlaup

Hálfmaraþonið var lagt á 2:03:33. Get ekki grenjað yfir því, þó ég hafi ætlað að ná þessu undir tveimur tímum. Hef aldrei hlaupið svona langt áður svo núna veit maður nokkurn veginn hvar maður stendur.

Vorum reyndar með sterkan mótvind á ca. 10km kafla, og svo var steikjandi sól. En þetta var rosalega skemmtilegt hlaup og pottþétt ekki það síðasta sem ég tek þátt í. Nú hefur maður líka tíma til að bæta sko :)

Svo koma stelpurnar eldsnemma í fyrramálið. Og þá verður nú kátt í höllinni :D

Leiðist þér?

Bla mælir með sýningunni "Ekki borða gulan snjó!" sem nú stendur yfir í Hinu Húsinu.

Stórefnilegir drengir þar á ferð og sýningin skemmtileg eftir því.

Hlakka til að fylgjast með framhaldinu...

Skoðið þessa neðstu vel :)

Nokkrar flottar auglýsingar.

Betra seint en aldrei

Setti inn nokkrar random myndir af Hvannadalshnjúk í 'labbmyndir' hérna til hægri.

-Mig langar aftur :)

Komin heim úr vel heppnuðu ferðalagi. Byrjaði í Veiðivötnum og lágu 8 urriðar og tvær bleikjur í valnum.

Æfði mig með flugustöngina með ágætum árangri... ef frá eru talin skiptin þar sem línan vafðist um hálsinn á mér og flugan kræktist í bakkann fyrir aftan mig.

Eftir veiðitúrinn var flakkað um landið og tjaldað við Langasjó, á Skaftafelli, Skipalæk í Fellabæ, við Mývatn tvær nætur og svo síðustu nóttina í sjálfum Kántríbænum á Skagaströnd. -Og já, gengið á Sveinstind.

Fengum fínt veður allan túrinn, fyrir utan þoku og leiðindi síðustu tvo dagana. Frábær ferð, en mikið verður gott að sofa í rúmi eftir tíu nætur í tjaldi!

-Læt fylgja með mynd af "The Russian Hummer" sem ég rakst á inni í Laugum :)

Munaðarlaus...

Stelpurnar fóru í gær til útlandsins og verða í næstum fjórar vikur. Það var ægilega erfitt að keyra burt frá flugvellinum, en eftir að ég heyrði frá þeim nýlentum og allt hafði gengið súper vel, er þetta bara alltílæ held ég. Ennþá :)

Svo er bara um að gera að halda sér bissí næstu vikurnar. Ætla að byrja á Veiðivötnum og sjá svo til. Er að spá í að fá mér svona til að spjalla við í bílnum á leiðinni.

Hér eru svo nokkrar skemmtilegar túristamyndir fyrir ykkur til að skemmta ykkur yfir á meðan.

Hvað var ég nú að koma mér í?

Jæja, þá er geðsjúklingurinn ég búin að skrá mig í hálf-maraþon 19. ágúst. Byrjuð að æfa á fullu og veitir víst ekki af, sér í lagi þar sem sumarfríið mitt kemur þarna inní og verður líklega ekki hlaupið mikið þar.

Össur ætlar að borga 1000 kall á hvern kílómetra sem starfsmenn hlaupa, og rennur ágóðinn til Íþróttafélags fatlaðra.

Ég hef reyndar aldrei tekið þátt í svona löngu hlaupi áður, -bara 10 km. En maður er auðvitað alltaf að hlaupa svo þetta hlýtur að hafast.

Aðal markmiðið verður allavega að ná að klára þetta. Ef ég næ því svo undir tveimur tímum þá verð ég mjög sátt.

Klikkhausar

Við stelpurnar (3/4 af okkur þ.e.) ákváðum að skella okkur í Þakgil um helgina. Er búin að heyra svo margt af þessum stað sem ég vildi sannreyna. Við vorum ekki sviknar, það er ofsalega fallegt þarna og leiðin af Þjóðvegi 1 þangað inneftir (um 14 km) er ævintýralega falleg. Fyrir þá sem ekki vita þá liggur þessi afleggjari rétt austan við Vík og er beygt til vinstri út af veginum. Ef beygt er til hægri og ekið í 14 km. þá endið þið úti í sjó. (Þetta er mjög mikilvæg vitneskja fyrir mig þar sem ég á erfitt með að þekkja í sundur hægri og vinstri :)

Við komum okkur vel fyrir með litla kúlutjaldið okkar, sem er nú bara svona svefntjald og rétt rúmar okkur þrjár. Svo var ég með lítið sóltjald sem ég setti upp við hliðina á tjaldinu og þar vorum við með borðið okkar, prímusinn og svoleiðis dótarí. Voða kósí og fínt hjá okkur. Við sváfum þarna um nóttina og á laugardeginum fórum við í bíltúr. Fórum í sund á Vík og þræddum svo alla vegaspotta sem við fundum þarna í nágrenninu.

Eftir frábæran dag komum við aftur inn í Þakgil, en þegar við komum að tjaldinu var búið að taka niður sóltjaldið og leggja það pent við hliðina á tjaldinu okkar. Og ofaní okkur var búið að tjalda einhverjum 4-5 hústjöldum og tjaldvögnum eða fellihýsum eða hvað þetta heitir alltsaman. Enginn var sjáanlegur í þessu nýuppsprottna tjaldþorpi svo við stelpurnar fórum bara að grilla kvöldmat og slappa af eftir daginn.

Eftir dálítinn tíma birtist fólk í tjaldbúðunum og kemur ein konan röltandi yfir til mín.

Kona: "Heyrðu, ég tók niður sóltjaldið hjá þér áðan"
Ég: "Já, ég tók eftir því"
Kona: "Já sko, það var ekki nóg pláss fyrir okkur og þú varst ekki hérna..."
Ég: "Það er fullt af lausum tjaldstæðum hérna í kring"
Kona: "Já, en við vildum vera hérna hjá okkar fólki"
Ég: "Já, það hefði nú verið allt í lagi að spyrja fyrst"
Kona: "Já, en það var enginn hérna!"

Þá benti ég henni á þá staðreynd að ég væri að borga jafn mikið fyrir tjaldstæðið undir litla kúlutjaldið mitt og hún fyrir hústjaldið sitt. Ég væri hérna í sumarfríi rétt eins og hún og hún hefði alveg getað beðið eftir mér. Hún tautaði einhverja afsökun og ég sagði að mér finndist þetta bara yfirgengileg frekja. Með það labbaði hún tautandi í burtu. Hún hafði greinilega átt von á því að ég segði: "Jájá, ekkert mál! Viltu ekki að ég færi tjaldið mitt líka hérna út í lækinn svo það sé nóg pláss fyrir ykkur?"

Ég tek það fram að ég var pollróleg þegar þessi samskipti okkar áttu sér stað. En við þetta máttum við una, það var búið að taka af okkur þessa litlu aðstöðu sem við höfðum komið okkur upp og við máttum matbúa og nærast í skjóli við bílinn.

Segið mér, hvað er í gangi í hausnum á svona fólki?!

Sumrinu hefur verið aflýst

Veðurguðirnir hafa komist að samkomulagi um það að sumrinu á Íslandi skuli aflýst þetta árið. Þetta ku stafa af ónógri þáttöku sólargeisla og stiga sem kennd eru við hita og oft mæld á celsius kvarða.

Ég hef aðeins eitt um þetta að segja:

"Better luck next year!"

Uppgjör síðustu vikna

Geðveikin: Roger Waters tónleikarnir!
Vitleysan: Snjór í Esjunni
Böggið: Uppselt á Ísland-Svíþjóð
Pirrið: Vírussýking í auganu
Uppgötvunin: Það ER geislaspilari í bílnum (og maður þarf að opna frontinn til að finna hann)
Endurvakningin: Geisladiskurinn "Hrekkjusvínin"
Kúlið: Veiðileyfi í 23 vötnum á 5000 kjell
And-kúlið: Veðrið (er ekki hægt að kæra einhvern?)
And-til-hlakkið: Stelpurnar fara til Kanada í Júlí :(
Til-hlakkið: Stelpurnar fara til Kanada í Júlí ;)

Afsakið hlé

Vegna tæknilegra örðugleika hef ég ekkert getað bloggað undanfarið. Nettengingin fór í skrall og eftir þriggja sólarhringa trouble shooting með hjálparlið Hive á línunni, auk tveggja innlagna á tölvuspítala fyrrnefnds hjálparliðs, lítur út fyrir að garmurinn sé sýkt af einhvers konar vírus sem blockar tenginguna. Jú, ég er með vírusvörn en get ekki uppfært hana þar sem ég get ekki tengst netinu.

Nú blogga ég á nýjasta fjölskyldumeðliminn; HP laptop sem elsta heimasætan eignaðist um daginn. Er búin að kalla út læknavaktina fyrir þá gömlu, svo hún kemst vonandi í lag á næstu dögum.

Ja hérna!

Aldrei á ævinni hef ég skemmt mér eins vel yfir Júróvisjón! Það að nokkrir miðaldra þungarokkarar í skrímslabúningum hafi unnið, er ekkert nema snilld. Ég hef aldrei nennt að taka þátt í svona kosningu en Finnar fengu sko mitt atkvæði í ár :)

Mikið rosalega held ég að keppnin á næsta ári verði flott. Þetta var akkúrat það sem þurfti; að rífa þetta aðeins upp úr þessu útburðarvæli sem hefur einkennt keppnina undanfarið.

Lordi rokka!

Nýr E-mobile

Það er með stolti sem ég leyfi mér að kynna nýjasta meðlim fjölskyldunnar. Sá er á fjórum hjólum (með drifi á þeim öllum) og gegnir nafninu Suzuki Vitara. Nú er bara spurning hvort sumarfríið sé nógu langt til að kanna alla þá staði sem hafa verið mér ófærir hingað til :)

(P.s. vantar einhvern ódýra notaða Corollu? ;)

Success!

Lögðum af stað uppúr þrjú á föstudeginum, sem leið lá í austur. Stoppuðum í Vík og fengum okkur hamborgara með öllu tilheyrandi, svona til að hlaða fyrir næsta dag. Vorum komin í Svínafell um áttaleitið, þar sem við gistum í fjórum fjögurra manna skálum. Ég var í skála með þremur herramönnum, sem ákváðu þessa nótt að fara í hrotukeppni, sem varð mér til lítils svefns!

Vöknuðum klukkan fjögur á laugardagsmorgninum og fengum okkur kjarngóðan morgunmat, og keyrðum svo inn að Sandfelli þaðan sem labbið hófst rétt uppúr sex.

Veðrið var algjörlega meiriháttar í byrjun göngunnar, morgunsólin skein á jöklana og fjöllin í kring. En þegar ofar dró fór að þykkna upp og jöklaþokan tók völdin. Þannig var það alla leið upp á topp, en upp komumst við! Það var ekki leiðinlegt að standa loks á tindinum sem við erum búin að vera að stefna á síðustu mánuði.

Öðru hverju rofaði þó aðeins til og útsýnið var bara stórkostlegt. Þegar við vorum að príla niður Hnjúkinn byrjaði hann að rífa af sér og blasti við okkur í öllu sínu veldi. Og allt í einu leið manni eins og pínulitlu krækiberi, og fannst hreint ótrúlegt að hafa staðið uppi á þessu ísstáli nokkrum mínútum áður.

Ferðin niður gekk vel og við gengum niður úr þokunni á svipuðum stað og hún hafði byrjað. Þá tók við kvöldsólin sem baðaði Öræfin, og ekki var það nú ljótt að sjá :)

Kom niður um fjórtán tímum eftir að gangan hófst; níu tíma upp og fimm niður. Þar þurfti ég að hinkra eftir samferðamönnum mínum sem voru með mér í bíl, og var orðin ansi stíf og "hrolluð" þegar þeir skiluðu sér. Ég hlakkaði mikið til að komast í heita sturtu á Svínafelli, og þegar þangað kom dreif ég mig og náði í föt til skiptanna og inn í sturtu. Nema hvað, vatnið er gashitað og heita vatnið var búið! Þannig að ég fór hrollköld í kalda sturtu, auk þess sem allt inni í klefanum var mígandi blautt svo fötin mín blotnuðu líka.

Jæja, adrenalínið varð að duga til að ylja mér og smá rauðvín hjálpaði líka til. Svo voru grilluð þrjú lambalæri og runnu ljúflega niður í mannskapinn sem var búinn að nærast á samlokum og súkkulaði í heilan dag.

Fórum í háttinn klukkan að ganga eitt, rúmum tuttugu tímum eftir ræsið um morguninn. Og engar hrotur hefðu getað haldið fyrir mér vöku þessa nótt :)

Vöknuðum hress uppúr átta á sunnudeginum og héldum af stað í bæinn eftir morgunmat og frágang. Við þremenningarnir í mínum bíl komum við í sundlauginni á Vík og lögðumst í bleyti í heita pottinn, sem var notalegra en svo að ég ætli að reyna að lýsa því.

Komin heim um fjögurleitið með feitt bros á vör, sem fer örugglega ekki af á næstunni :)

Countdown to Mt. Hvannadals Peak

Í dag var síðasta æfingin fyrir Hvannadalshnjúk, enda bara 5 dagar til stefnu.

Síðan við byrjuðum að æfa í febrúar hef ég gengið 6 sinnum á Esjuna, þar af þrisvar upp að Steini og þrisvar upp á Þverfellshorn. Auk þess einu sinni á Móskarðshnjúkana, Ármannsfellið, Botnssúlur og Vífilsfell.

Maður er allavega kominn í þokkalegt form og ætti því að geta fengið helling út úr næstu helgi, þ.e. ef við fáum gott veður. Nú veltur allt á því hvort það verður farið upp eða ekki (og já, það eru margir sem þurfa að hætta við eða snúa við á leiðinni vegna veðurs).

En við erum full bjartsýni (þar til annað kemur í ljós)!

(Sé ég krosslagða fingur?)

Lazy Town

Óvissuferðin var snilld. Við völdum okkur öll þema, ég valdi kvikmyndir og það var farið með okkur í upptökustúdíóið hjá Latabæ. Ekkert smá gaman að fá að skoða þetta og fræðast um þetta snilldar fyrirtæki. Við fengum að horfa á upptöku og það var vægast sagt fyndið að heyra Sigga sæta kalla: "Who's your Daddy?!" þegar upptakan tókst :D

Síðan var haldið í Mörkina þar sem beið okkar ítalskt hlaðborð. Þar var borðað og blaðrað, drukkið og dansað við tónlist frá skemmtilegri hljómsveit sem ég kann ekki að nefna.

Um ellefu var svo stefnan tekin á Players og dansað fram á nótt í brjálaðri stemmningu. Rölti heim um hálf fjögurleitið og svaf veeeeel og vandlega :)

Ljúft.

Ekki samt Coca Cola

Gengum á Vífilsfell í morgun. Hef gengið á það einu sinni áður, þegar ég var held ég 17 ára. Fengum frekar skrautlegt veður, allt frá logni og sólskini upp í haglél og stífa suðvestanátt... sem var þó mun betra en rigningin sem hafði verið spáð. Vífilsfell er rosalega flott fjall, þó það sé ekkert sérstaklega hátt, tæpir 600m. Blanda af stórgrýti og móbergsklettum, og ekki spillti fyrir hvað það var fallega skreytt með snjó til að auka á contrastinn.

2 vikur í Hnjúkinn. Allir að krossa fingur svo við fáum gott veður!

Gleðilegt sumar!

Fannst við hæfi að byrja daginn á því að labba á Esjuna. Komum svo við á kaffihúsi á heimleiðinni og fengum okkur brauð og yl í kroppinn.

Fór með bílinn á verkstæði í fyrradag og hann var tilbúinn í gær. Búið að skipta um húdd og grill og laga smá dæld á stuðaranum og svo auðvitað sprauta allt saman. Hröð þjónusta þar!

Ég er nú samt farin að kíkja aðeins í kringum mig og spá í að skipta á meðan ég fæ ennþá eitthvað fyrir þennan. Tók góðan bílasölurúnt eftir hádegið og skoðaði helling. Er dálítið spennt fyrir Subaru Forester, enda er hann líklega næst því sem komist verður að vera jeppi, án þess að vera jeppi... ef þið skiljið mig. Svo fær hann rosalega góða dóma þegar kemur að bilunum... eða ekki bilunum.

Þeir eru nokkrir þarna úti á sölunum og einn eða tveir sem kæmu hugsanlega til greina. Ætla samt ekki að flana út í neitt en bíða aðeins og sjá hvort það kemur einn á góðum díl.

Meira labb

Lögðum af stað í morgun í fallegasta veðri sem hægt var að vonast eftir. Stefnan var tekin á Botnssúlur og var glampandi sól og blankalogn alla leiðina upp. Snjór yfir öllu og útsýnið hreint ótrúlegt.

Þegar við vorum komin uppundir kletta á Syðstusúlu skall á hríð. Við ákváðum að hinkra aðeins og sjá hvort myndi létta til, en svo fór að við þurftum að snúa við enda bratt og hált þarna uppi og ekkert vit að brölta um í svona veðri.

Úr þessu náðum við þó fimm klukkutíma labbi og fórum upp í 900 metra hæð sem er nú ekkert til að grenja yfir.

Gerum svo bara aðra atrennu, fyrr en seinna.

P.s. 3 vikur í Hnjúkinn!

Melding

Skokkaði á Esjuna á sunnudagsmorgun. Náði þó ekki tímanum sem ég setti mér... skal ná honum næst.

Bíllinn fer á verkstæði á þriðjudaginn eftir páska. Fær nýtt húdd og grill, sem er ekki eins slæmt og það leit úr fyrir í fyrstu.

Á meðan krúsa ég um bæinn á Toyota Yaris dós í boði Tryggingamiðstöðvarinnar.

Framundan er kærkomið páskafrí sem verður notað í alvöru fjallaklifur, páskaeggjaát og afslöppun þar á milli.

Veriði góð.

Aaauuumingja E-Mobile

Stóð inni í eldhúsi áðan og var að malla kvöldmatinn þegar síminn hringdi. Í hinum enda línunnar hékk lögreglumaður og var að hringja utanaf bílastæði. Það var sumsé búið að bakka á bílinn minn, og það ekkert smá bakk!

Ég tók ekki einu sinni eftir því hvers konar bíll þetta var sem misþyrmdi E-Mobile svona. Nema hvað hann var STÓR og SVARTUR (og örugglega ljótur líka)!

Greyið Toyan er nú með krumpað húdd og þarf að fara á spítala :/

Jæja, sjitt happens og ég er bara fegin að gaurinn lét vita, en keyrði ekki bara í burtu. Hann hefði hæglega getað komist upp með það, enda sá ekki á hans bíl.

Fjúk

Löbbuðum á Esjuna í morgun í brjálaðri Norðanátt. Vorum með vindinn í fangið alla leiðina upp og var varla stætt á köflum. Fórum bara upp að Steini, enda óvíst að ég sæti hérna núna ef við hefðum lagt í klettana í þessu veðri :)

Setti inn nokkrar myndir.

Ef einhver getur bent mér á gott myndakerfi á netinu þá yrði ég ROSAGLÖÐ. Þær tapa svo gæðum á þessu msn-kerfi. Prófaði flickr í dag, en kláraði upload limmitið á nokkrum myndum (og var auðvitað strax boðið að upgrate-a fyrir aðeins $24.95!)

Anyone?

Bloggleti

Selma fermdist um síðustu helgi og gekk allt vel og allir sáttir og ánægðir með athöfnina, veisluna og myndatökuna. Mikið er ég samt fegin að hafa klárað þetta allt á einum degi. Hef nefnilega heyrt af fólki sem var með þetta þrennt allt sinnhvern daginn, með þremur fermingargreiðslum, fataskiptum, meiköppi og tilheyrandi. Nej tak.

Setti inn myndir á síðuna hennar Júlíu.

Labbaði ekkert um síðustu helgi, enda allir uppteknir við að halda veislur eða mæta í annara manna veislur. Er að spá í að skoða Esjuna í fyrramálið. Svo verður tekið vel á því um páskana.

5 vikur í Hvannadalshnjúk! Vona bara að veðrið klikki ekki.

Labb

Labbið heldur áfram og í morgun varð Ármannsfellið fyrir valinu. Það er sumsé staðsett á Þingvöllum og telur eitthvað yfir 700 metra af hæsta punkti.

Reyndar bailuðu báðir félagar mínir svo ég fékk að troða mér inn á hinn hópinn sem er líka að æfa sig fyrir sömu ferð.

Við lögðum af stað í svartaþoku, bjartsýn á að henni myndi nú létta. Þegar við komum heim fimm tímum seinna var enn svartaþoka og auk þess farið að rigna.

En labbið var fínt, við fórum upp á topp (auðvitað) og héldum svo áfram og niður hinum megin. Þurftum svo auðvitað að labba hálfan hring í kringum fjallið til að komast að bílnum :)

What's happenin'?

Hvað er að gerast?
-ROGER WATERS AÐ GERAST!

Hvar þá?
-Í EGILSHÖLL!

Hvenær?
-12. JÚNÍ!

Og hverjir mæta?
-ÉG!! (...og Erna líka smá)

Újeeeee!

Einn lítill, tveir litlir, þrír litlir hnjúkar...

Vaknaði til að fara að pissa klukkan eitt í nótt. Varð litið út um gluggann og sá mér til hrellingar að snjó kyngdi niður eins og honum væri borgað fyrir það.

Við labbararnir létum það ekki á okkur fá og héldum af stað klukkan átta í morgun, með stefnuna á Móskarðshnjúkana.

Þetta var fín æfing, allt snævi þakið og útsýnið frábært (þennan stutta tíma sem þokunni létti sko).

Komin heim um hádegið, vel sátt og hlakka til næsta laugar-labbdags :)

Myndir

Hér sé stuð

Árshátíðin var algjörlega frábær. Maturinn var æði, allir réttirnir sem einn.

Felix Bergsson stóð sig vel sem veislustjóri og svo kom Jóhannes eftirherma og allir grétu úr hlátri.

Þá var komið að upphitunarbandinu - Hundur í óskilum. Af hverju hef ég aldrei heyrt af þessu bandi?! Þessir gaurar eru ótrúlegir! Það lá allur salurinn í gólfinu og fólki var orðið alveg sama hvort Stuðmenn kæmu eða ekki.

Jæja, þeir komu nú samt og voru auðvitað frábærir líka. Andrea Gylfa söng með þeim, sem kom flott út.

Kom heim klukkan fimm og var vöknuð klukkan átta. Þrátt fyrir að hafa byrjað gærdaginn á Esjulabbi og endað hann á dansgólfinu. Maður er náttúrulega ekki alveg eðlilegur.

Labbi-labb

Gekk á Esjuna í gærmorgun með tveimur vinnufélögum. Veðrið var algjörlega meiriháttar og við náðum upp að vörðu á klukkutíma og korteri.

Við erum að plana labb á Hvannadalshnjúk í maí, ásamt fleiri Össuringum, svo nú á að byrja að æfa sig. Kannski við náum þessu á klukkutíma næsta laugardag.

Myndir hér.

(Reyndar frekar óskýrar, en whattheheck... sönnunargögn engu að síður :)

*hugs*

Húsfluga suðar inni á baðherbergi.
Krókusarnir eru byrjaðir að springa út fyrir utan gluggann.
Ég mætti feitum ánamaðki á gangstétt í dag.
Það var 9 stiga hiti klukkan sjö í morgun.

Og samt stendur klárlega 21. febrúar hér fyrir ofan.

?

Til hamingju Rósa og Biggi!!

Með litla krúttrassinn ykkar! Fyrr má nú líkjast mömmu sinni, en vá!

Hún er eins og klónuð :)

Má ég eig'ann?

Fékk símtal frá Ernu í gærkveldi þar sem hún var úti með vinkonu sinni:

"Mamma, hverjar eru reglurnar með ketti í húsinu hjá okkur?"

Ó, nei! Hugsaði ég og útskýrði að það væri bannað að hafa ketti í fjölbýlishúsum nema fá samþykki allra íbúa og bla bla.

Erna: "Sko, við fundum nefnilega kettling... hann er heimilislaus, grútskítugur og blautur og er búinn að elta okkur heillengi".

Ég spurði hvernig hún vissi að hann væri heimilislaus.

"Bara... sko hann er ekki með neina ól og hann er kaldur og blautur."

Eftir smá samtal sagði ég henni að koma með kisa heim, ég skyldi kíkja á hann. Ekki það að við hefðum getað haldið honum en ef lýsingin var rétt þá mátti hlýja greyinu og fara svo með hann í Kattholt.

Jæja. Smá stund líður. Svo koma Erna og vinkonan heim. Erna heldur á gömlum, feitum fressketti sem greinilega hafði 'hreinkast' eitthvað á leiðinni en var þó dálítið blautur... enda rigning úti. Af atferlinu að dæma átti hann örugglega fínt heimili, var kelinn og vanur að láta hnoðast með sig.

Svo greyið fékk túnfisk og handklæðaþurrkun, fyrst hann var nú kominn innfyrir, og var svo hleypt út, þar sem hann trítlaði saddur heim á leið.

Til hamingju Ísland!

Ég verð að viðurkenna að ég þoldi ekki karakterinn fyrst þegar hún var að koma í ljós á skjánum. En smám saman fór maður að fatta þetta og nú finnst mér hún ekkert nema snilld!

Áfram Silvía Nótt, Hommi og Nammi!!!

:D

Lasarus

Ég er heima með Svarthöfða í dag. Allavega hljómar hún eins og Svarthöfði þegar hún andar greyið. Eða svona cross-breed milli hans og snigils, hún er svo kvefuð að það er svona slímrönd á eftir henni hvar sem hún fer.

Var þetta ekki falleg lýsing hjá mér?

Ég nota öll ráð sem ég kann til að láta henni batna, af tómri sjálfselsku þar sem ég veit fátt eins leiðinlegt og að vera föst heima yfir veikum börnum.

(-And the "Mother of the Year Award goes to...")

Og kallinn prumpar svooooona

Ókey, ég er búin að fatta þetta með Júróvisjón. Það er verið að grínast í okkur, þetta er bara brandari. -Framhald á áramótaskaupinu, þetta er svo augljóst núna.

Sáuð þið til dæmis þessa Fanneyju sem kom alla leið frá útlandinu til að breima um hvað hún væri hamingjusöm. Þetta var auðvitað engin Fanney, heldur Bjögvin Franz Gíslason! Spáið í það næst þegar þið sjáið þetta andlit... alveg eins og Björgvin í skaupinu að leika Birgittu Haukdal.

Hitt er svo ennþá augljósara. Ég meina, Geir Ólafsson? HAHAHAHAHAHA! Æ, mér líður svo miklu betur núna að vita að þetta var alltsaman bara djók.

Svo er bara að senda Doktor Gunna í keppnina með Prumpulagið. Þá er þetta fullkomnað.

Enn eitt klukkið

Ásdís klukkaði mig, so here goes:


Fjögur störf sem ég hef unnið við
Humarvinnsla á Höfn
Umönnun á Landspítalanum í Kópavogi
Klippari á Bangz Hair and Esthetics í Halifax
Veskjatilbúari hjá Atson - Leðuriðjunni

Fjórar myndir sem ég gæti horft á aftur og aftur
Lord of The Rings serían
The Nightmare before Christmas
Charlie and the Chocolate Factory
The Lion King

Fjórir staðir sem ég hef búið á
Halifax í Kanada
2 staðir í vesturbæ Kópavogs
3 staðir í austurbæ Kópavogs

Fjórir sjónvarpsþættir sem ég fíla að horfa á
My name is Earl
Rescue Me
Scrubs
Malcom in the Middle


Fjórir staðir sem ég hef ferðast til (í fríi)
London
Amsterdam
Barcelona
New York

Fjórar vefsíður sem ég fer inn á daglega
www.mbl.is
www.visir.is
www.b2.is
blogghringurinn

Fjórar uppáhaldsmatartegundir
Nautasteik, medium rare
Sushi
Fiskibollurnar hans pabba
Góð pizza

Fjórir CD sem ég gæti ekki verið án
(Þetta er næstum því ómögulegt, þeir eru svo margir svo ég nefni bara nokkra random)
Parachutes - Coldplay
Hopes and Fears - Keane
The Long Road - Nickelback
Songs from the last Century - George Michael

Fjórir staðir sem ég mundi frekar vilja vera á
Það er enginn staður sem ég vildi frekar vera á, en hellingur sem mig langar til að heimsækja:
Ástralía
Mexico
Kína
Egyptaland


Fjórir bloggarar sem ég ætla að klukka
Gurrý
Ragnar Nói
Selma
Jóhanna

NEI! NEI! NEI!

Jæja, hver sá Júróvisjon á laugardaginn? Þ.e.a.s. þennan fjórðung laga sem keppa í undankeppninni um hver fær að fara í keppnina fyrir Íslands hönd.

Ó MÆ GOD! -hvað þetta voru ömurleg... fyrirgefiði - ÖMURLEG lög! Eina lagið sem var ókey var þetta með henni Regínu Ósk, eða hvað hún heitir, Idol-stjörnu. Tónarnir sem hún söng voru ómannlegir, og lagið var bara flott.

Öll hin... og þá meina ég ÖLL HIN LÖGIN MEÐ TÖLU hljómuðu eins og þau væru frá dögum 'Gleðibankans'.

Ég trúi varla að tónlistarfólk í dag sendi svona viðurstyggð frá sér. Þetta eru lögin sem láta útvarpstækin fremja sjálfsmorð!

Bjakk! *ptuiii* *ptuiii*

Sýnishorn úr Orðabók Hlíðarhjallagengisins

Furuhnetur - Furðuhnetur
Hrökkbrauð - Rokkbrauð
Nautakjöt - Nautnakjöt
Folaldahakk - Foreldrahakk
Marmelaði - Remúlaði
Rabarbarasulta - Barbapapasulta
Malakoff - Landakort
Hakk og Spaghettý - Spakk og Haghettý

Rokkbrauð með remúlaði er einmitt í miklu uppáhaldi hjá Júlíu þessa dagana :)

Borðar þú skötu?

- Var spurning forvitnispúkans fyrir jólin og svörin eftirfarandi:

Jahá! 38%
Nei, bleeeh! 23%
Hef aldrei smakkað hana 38%

Ég hlakkaði sjálf voða mikið til að fá að spreyta mig á skötuáti á Þorláksmessu, en svo var bara hangikjöt í matinn í vinnunni. En ég er staðráðin í að smakka hana næst, hvar sem það verður! (...og hef þá árið til að undirbúa mig)

Nýr forvitnispúki er á þjóðlegum nótum í þetta sinn, til heiðurs Þorranum sem byrjar 20. janúar.

Allt er vænt sem vel er grænt

Er samt ekki alveg viss um að ég fíli þetta nýja template. Af hverju er svona lítið úrval þarna hjá þeim bloggerum? Ætla að reyna að fikta eitthvað í þessu við tækifæri.

Tölvan virkar svona stundum. Þ.e.a.s. skjárinn... kveikir á sér þegar hann nennir og þar sem tölvan er innbyggð er víst ekki hægt að fá nýjan skjá.

Af hverju er ég ekki í vinnunni klukkan 8:20 á föstudagsmorgni? -HAFIÐI LITIÐ ÚT? Bíllinn fastur hér fyrir utan og ég bíð eftir Hlölla bró að koma og draga mig nógu langt til að ég komist í vinnuna.

Gaman aððessu.

Den er död

Tölvan dó. Það verður því eitthvað fátæklegt bloggið á næstunni. Annars kom Júlía með umslag til mín um helgina með sjö krónum í, til að hjálpa mér að kaupa nýja tölvu svo vonandi þurfum við ekki að vera lengi tölvulausar ;)

Læt í mér heyra þegar þar að kemur, veriði stillt á meðan.

Gleðilegt nýtt ár!

Megi það verða ykkur gott og farsælt, fengsælt, happadrjúgt, hamingjusamt, ástríkt, hvetjandi, auðgandi, eflandi, gefandi...

...og bara alveg hreint frábært!